អគ្គលេខាធិការសម្ព័ន្ធអារ៉ាប់ Ahmed Aboul Gheit បានថ្កោលទោសចំពោះការវាយប្រហាររបស់អ៊ីស្រាអែល លើភូមិ Kuwayya របស់ស៊ីរី ក្នុងខេត្ត Daraa ដែលបានបណ្តាលឲ្យមនុស្សជាច្រើន ស្លាប់។

លោក Aboul-Gheit បាននិយាយកាលពីថ្ងៃពុធថា សម្ព័ន្ធអារ៉ាប់ បានថ្កោលទោសជាដាច់ខាតចំពោះការឈ្លានពានរបស់អ៊ីស្រាអែលប្រឆាំងនឹងស៊ីរី ដោយបន្ថែមថា ការវាយប្រហារ ស្មើនឹងការរំលោភយ៉ាងធ្ងន់ធ្ងរលើអធិបតេយ្យភាពរបស់ប្រទេសនេះ។

លោកបានបន្ថែមថា អ៊ីស្រាអែលកំពុងព្យាយាមប្រើរយៈពេលអន្តរកាល ក្នុងប្រទេសស៊ីរី «ដើម្បីបញ្ឆេះការបះបោរ និងជម្លោះ»។

លោក Aboul Gheit បានជំរុញឲ្យក្រុមប្រឹក្សាសន្តិសុខអង្គការសហប្រជាជាតិបញ្ឈប់សកម្មភាពរបស់អ៊ីស្រាអែលប្រឆាំងនឹងស៊ីរី និងធានាថា ទីក្រុងតែលអាវីវ ( Tel Aviv) គោរពច្បាប់អន្តរជាតិ និងកិច្ចព្រមព្រៀងបញ្ចប់សង្គ្រាម ឆ្នាំ ១៩៧៤។

អាជ្ញាធរស៊ីរី បាននិយាយកាលពីថ្ងៃអង្គារថា ការវាយប្រហារលើភូមិ Kuwayya បានសម្លាប់ជនស៊ីវិលយ៉ាងតិច ៦នាក់។

អ៊ីស្រាអែលបានបន្តយុទ្ធនាការវាយប្រហាររបស់ខ្លួន នៅក្នុងប្រទេសស៊ីរី បន្ទាប់ពីការបណ្តេញលោក បាសា អាល់អាសាដ (Bashar al-Assad) ចេញពីអំណាច ដែលបានបញ្ចប់ការគ្រប់គ្រងរបស់លោក កាលពីឆ្នាំមុន បន្ទាប់ពីការសម្រុកចូលទៅមុខរបស់ក្រុមឧទ្ទាម បានបង្ខំឲ្យលោកភៀសខ្លួន ទៅកាន់ប្រទេសរុស្ស៊ី។