ក្រុមអ្នកវិទ្យាសាស្ត្រអន្តរជាតិ នៅថ្ងៃព្រហស្បតិ៍ (ទី២៧ ខែមីនា) នេះ បានលើកឡើងថា ភ្លៀងធ្លាក់ខ្លាំង រហូតនាំឲ្យមានគ្រោះមហន្តរាយទឹកជំនន់ នៅភាគកណ្តាលប្រទេសអាហ្សង់ទីន ដែលបានសម្លាប់មនុស្ស ១៦នាក់ កាលពីដើមខែនេះ ត្រូវបានជំរុញមួយផ្នែកដោយបម្រែបម្រួលអាកាសធាតុ ហើយអាចទៅជាញឹកញាប់ជាងនេះ នៅពេលភពផែនដីកាន់តែក្តៅឡើងៗ។

ការវិភាគ ដោយស្ថាប័នអាកាសធាតុពិភពលោក (WWA) បានរកឃើញថា កម្ដៅក្ដៅខ្លាំង នៅក្នុងតំបន់ដែលមិនទាន់មានទឹកជំនន់ បានបង្កឲ្យមានម៉ាស់ខ្យល់ក្តៅ និងសើមជាងមុន ដោយបានប៉ះជាមួយនឹងប្រព័ន្ធខ្យល់ត្រជាក់ពីតំបន់ Patagonian របស់អាហ្សង់ទីន ដែលបណ្តាលឲ្យមានភ្លៀងធ្លាក់ខ្លាំង នៅ Bahia Blanca ជាទីក្រុងកំពង់ផែចម្ងាយប្រហែល ៥៥០គីឡូម៉ែត្រ នៅភាគខាងត្បូងនៃទីក្រុង Buenos Aires។

នៅឯសន្និសីទសារព័ត៌មាន កាលពីថ្ងៃពុធ (ទី២៦ ខែមីនា) អ្នកនិពន្ធ និងជាអ្នកវិទ្យាសាស្ត្រម្នាក់ នៅវិទ្យាស្ថានអាហ្សង់ទីន សម្រាប់ការស្រាវជ្រាវពីស្រទាប់ព្រិល ផ្ទាំងទឹកកក និងវិទ្យាសាស្ត្របរិស្ថាន (IANIGLA) គឺលោក Juan Rivera បាននិយាយថា៖ «សូចនាករពីកម្ដៅ និងសំណើម (ដែលនៅមុនមានទឹកជំនន់) ស្ទើរតែមិនអាចទៅរួចទេ បើគ្មានបម្រែបម្រួលអាកាសធាតុ»។

លោក Rivera បានប្រាប់ថា រយៈពេលជាច្រើនថ្ងៃ ដោយសីតុណ្ហភាពលើសពី ៤០អង្សាសេ នៅភាគខាងជើង និងកណ្តាលអាហ្សង់ទីន ដោយមានទាំងរលកកម្ដៅសើមភ្លាមៗ មុនភ្លៀង រួមផ្សំជាមួយនឹងសំណើមខ្លាំងពីតំបន់ព្រៃ Amazon បាននាំឲ្យមានសំណុំសំណើមដែលបានបង្កជាទឹកភ្លៀងកម្រិត ៣០០មីលីម៉ែត្រ នៅទីក្រុង Bahia Blanca ក្នុងរយៈពេលត្រឹមតែ ៦ម៉ោង។

អមដោយការកត់សម្គាល់ថា ប្រព័ន្ធខ្យល់ត្រជាក់បានអូសបន្លាយពេញតំបន់នេះអស់រយៈពេលជាច្រើនម៉ោង មុនពេលដែលនៅទីបំផុតបានបម្លាស់ទីនោះ លោក Rivera បានបន្ថែមថា «ទឹកជំនន់ទាំងនេះមិនធ្លាប់កើតមានមកពីនោះទេមុន នៅក្នុងស្ថានីយសេវាឧតុនិយមជាតិ»។ 

ការសិក្សាបានបង្ហាញទៀតថា កម្ដៅខ្លាំង មុនមានភ្លៀង នៅតែជាព្រឹត្តិការណ៍កម្រ ដោយកើតឡើងរៀងរាល់ ៥០ឆ្នាំ ទៅ ១០០ឆ្នាំម្ដង ប៉ុន្តែបម្រែបម្រួលអាកាសធាតុ កំពុងធ្វើឲ្យសីតុណ្ហភាពទាំងនេះកើតឡើងកាន់តែញឹកញាប់ និងកាន់តែធ្ងន់ធ្ងរជាងមុន៕