មន្ត្រីក្រុង ២នាក់ ដែលបាននិយាយក្នុងលក្ខខណ្ឌមិនបញ្ចេញឆ្មោះ នៅថ្ងៃព្រហស្បតិ៍ (ទី២៧ ខេមីនា) បានឲ្យដឹងថា មនុស្សយ៉ាងតិច ៦នាក់ បានបាត់បង់ជីវិត ហើយជាច្រើននាក់ផ្សេងទៀតបានរងរបួស បន្ទាប់ពីនាវាមុជទឹកទេសចរណ៍ ១គ្រឿង បានលិចនៅម្ដុំឆ្នេរនៃប្រទេសអេហ្ស៊ីប។

រថយន្តសង្គ្រោះជាច្រើនគ្រឿង ត្រូវបានបញ្ជូនទៅកាន់ច្រាំងក្បែរកន្លែងកើតហេតុ ក្នុងតំបន់ទេសចរណ៍ទីក្រុង Hurghada។ មូលហេតុដែលនាំឲ្យមានឧបទ្ទវហេតុនេះ មិនទាន់ត្រូវបានដឹងនៅឡើយទេ។

ប្រព័ន្ធផ្សព្វផ្សាយក្នុងស្រុករាយការណ៍ថា នាវាដែលមានឈ្មោះថា «Sindbad» បានលិចដោយមានអ្នកដំណើរប្រហែល ៤៤នាក់ដែលមានសញ្ជាតិផ្សេងៗគ្នាជិះនៅលើនោះ។ សារព័ត៌មាន Metro បានរាយការណ៍ថា អ្នកដំណើរ ៤នាក់ ក្នុងចំណោមអ្នករងរបួស ត្រូវបានដឹងថា ស្ថិតក្នុងស្ថានភាពធ្ងន់ធ្ងរ។ យ៉ាងហោចណាស់មនុស្ស ២៩នាក់ ត្រូវបានជួយសង្គ្រោះភ្លាមៗ បន្ទាប់ពីនាវាបានលិច។ នាវាមុជទឹកនេះ បានដំណើរការផ្នែកទេសចរណ៍នេះជាច្រើនឆ្នាំមកហើយ។

យាននេះត្រូវបានគេដឹងថា ជា «នាវាមុជទឹកពាក់កណ្តាល» ដែលត្រូវបានរចនាឡើង សម្រាប់ការធ្វើដំណើរទស្សនាទិដ្ឋភាពក្រោមទឹក នៅសមុទ្រក្រហម ដែលអ្នកទេសចរអាចមើលឃើញជីវិតសត្វសមុទ្រ នៅបាតសមុទ្រ។ យោងតាមសេចក្ដីរាយការណ៍ បានឲ្យដឹងថា នាវាមុជទឹកទេសចរណ៍ បានលិចនៅពីមុខកំពង់ផែសម្រាប់លំហែនៃ «សណ្ឋាគារដ៏ល្បីល្បាញឈ្មោះមួយ» នៅក្នុងទីក្រុង Hurghada៕