តុលាការនៃប្រទេសប៊ូស្នីបានចេញដីកាចាប់ខ្លួនអន្តរជាតិ ចំពោះមេដឹកនាំស៊ែប៊ីដើមកំណើតប៊ូស្នី គឺលោក Milorad Dodik ដែលត្រូវបានចោទប្រកាន់ពីបទធ្វើឲ្យប៉ះពាល់ដល់ច្បាប់រដ្ឋធម្មនុញ្ញ និងបានផ្គើនចេញទៅក្រៅប្រទេស។

លោក Dodik ដែលជាប្រធានាធិបតីនៃតំបន់សាធារណរដ្ឋស៊ែប៊ីរបស់ប្រទេសប៊ូស្នី បានបង្កឲ្យមានវិបត្តិធ្ងន់ធ្ងរ គិតចាប់តាំងពីសង្រ្គាមឆ្នាំ១៩៩០ បន្ទាប់ពីត្រូវបានកាត់ទោសឲ្យជាប់ពន្ធនាគាររយៈពេល ១ឆ្នាំ និងត្រូវបានហាមឃាត់មិនឲ្យធ្វើនយោបាយ ៦ឆ្នាំ ពាក់ព័ន្ធនឹងការចោទប្រកាន់ពីបទមិនគោរពតាមការសម្រេចរបស់បេសកជនសន្តិភាពអន្តរជាតិ។

លោក Dodik ដែលជាអ្នកតស៊ូមតិយូរអង្វែងគាំទ្ររុស្ស៊ី ក្នុងការធ្វើអបគមន៍ពីប៊ូស្នី បានផ្តួចផ្តើមឲ្យមានច្បាប់ដែលរារាំងតុលាការ និងនគរបាលរបស់រដ្ឋមិនឲ្យធ្វើប្រតិបត្តិការ នៅក្នុងតំបន់ស៊ែប៊ី ប៉ុន្តែតុលាការធម្មនុញ្ញរបស់ប៊ូស្នី បានសម្រេចព្យួរជាបណ្តោះអាសន្ននូវច្បាប់នោះ។

ដោយប្រឆាំងនឹងដីកាចាប់ខ្លួនជាតិ លោកបានឆ្លងចូលទៅក្នុងប្រទេសជិតខាងស៊ែប៊ី កាលពីដើមសប្តាហ៍នេះ ដែលបន្ទាប់មកបានធ្វើដំណើរទៅកាន់ប្រទេសអ៊ីស្រាអែល ដើម្បីចូលរួមសន្និសីទប្រឆាំងជនជាតិជ្វីហ្វនិយម នៅក្នុងទីក្រុងហ្សេរុយសាឡឹម នាថ្ងៃព្រហស្បតិ៍ (ទី២៧ ខែមីនា) នេះ។

ជាមួយគ្នានេះ តុលាការរដ្ឋរបស់ប្រទេសប៊ូស្នី បានប្រាប់ឲ្យដឹងទៀតថា ដីកាអន្តរជាតិ ក៏ត្រូវបានចេញផងដែរ សម្រាប់លោក Nenad Stevandic ប្រធានសភានៃសាធារណរដ្ឋស៊ែប៊ី ដែលបានធ្វើដំណើរទៅស៊ែប៊ី ទោះបីជាពេលនេះបានត្រលប់ចូលប្រទេសប៊ូស្នីវិញហើយក៏ដោយ។ តុលាការបានបន្ថែមនៅក្នុងសេចក្តីថ្លែងការណ៍មួយថា ដីកានេះ កំពុងដាក់ទៅនគរបាលអន្តរជាតិអាំងទែរប៉ូល (Interpol)៕