​ប្រដាល់៖ សហព័ន្ធ​កីឡា​ប្រដាល់សកល​កម្ពុជាបានប្រកាស​រៀបចំ​ ការ​ប្រកួត​កីឡា​ប្រដាល់សកល​ជ្រើសរើស​ជើងឯក​ថ្នាក់ជាតិឆ្នាំ​២០២១ នា​ថ្ងៃទី​២៣ ដល់​ថ្ងៃទី​២៦ ខែធ្នូ​ខាងមុខនេះ ដើម្បី​ពង្រឹង​បន្ថែម​លើ​ក្រុម​ជម្រើសជាតិ​ត្រៀម​ការប្រកួត​ស៊ី​ហ្គេម​នាពេលខាងមុខ។ ការកំណត់​កាលបរិច្ឆេទ​រៀបចំ​ជើងឯក​ថ្នាក់ជាតិ​នេះ បន្ទាប់ពី​សហព័ន្ធ​បានបញ្ចប់​កម្មវិធី Ultimate Boxing Championship 2021 (UBC ដោយ​ជោគ​ជ័យកាលពី​ថ្មីៗ។​

​លោក ប៊ុ​យ សុ​ភ័​ណ្ឌ អគ្គលេខាធិការ​សហព័ន្ធបាន​បញ្ជាក់ថា ការរៀបចំ​កម្មវិធី Ultimate Boxing Championship គឺជា​ផ្លែផ្កា​មួយ​ដ៏​ប្រសើរសម្រាប់​ពង្រឹងសមត្ថភាព​ក្រុម​ជម្រើសជាតិ ត្រៀម​ការប្រកួត​ជើងឯក​ថ្នាក់ជាតិ​នា​ចុងខែ​ធ្នូ​នេះ។ លោក​រំពឹងថា ការបង្កើត​ឲ្យ​មានកម្ម​វិធីប្រកួត​ច្រើន​បែបនេះនឹង​ជំរុញ​សមត្ថភាព​កីឡាករ​ប្រដាល់សកល ពិសេស​កីឡាករ​-​កីឡាការិនី​ជម្រើសជាតិ​កាន់តែ​រីកចម្រើន​សម្រាប់ត្រៀម​ស៊ី​ហ្គេម។

​

​អគ្គលេខាធិការ​ដដែល​បន្ដថា ដើម្បី​បង្កើន​សមត្ថភាព​ក្រុម​ជម្រើសជាតិ​ឲ្យ​កាន់តែខ្លាំង​នោះ សហព័ន្ធ​មាន​គម្រោង​រៀបចំ​ការប្រកួត​ជាច្រើន ជាក់ស្ដែង​ក្រោយ​បញ្ចប់​ការប្រកួត​ជើងឯក​ថ្នាក់ជាតិ សហព័ន្ធ​មាន​គម្រោង​រៀបចំ​ព្រឹត្តិការណ៍​ធំ​មួយដើម្បី​អបអរ​ទិវា​ជ័យជម្នះ ៧​មករា និង​ការប្រកួត​ផ្សេងៗ​ទៀត ពិសេស​កម្មវិធី Ultimate Boxing Championship ដែល​សហព័ន្ធ​គ្រោង​រៀបចំ​ជាថ្មីក្រោយ​ស៊ី​ហ្គេមឆ្នាំ​២០២២ នៅវៀតណាម៕

​អត្ថបទ៖ លី ឈុន​ឡា