បាល់ទាត់៖ ខ្សែប្រយុទ្ធ សារ ទី បានប្ដេជ្ញាខំប្រឹងអស់ពីសមត្ថភាពដើម្បីប្រជែងកៅអីជាមួយរៀមច្បង និងមានឱកាសលេងនៅជម្រើសជាតិកម្ពុជា ពិសេសក្នុងការប្រកួតពានរង្វាន់ប្រចាំតំបន់ AFF Suzuki Cup 2020 នៅប្រទេសសិង្ហបុរីនាសប្ដាហ៍ក្រោយ។ សមាជិកក្លិបអគ្គិសនីកម្ពុជារូបនេះបានទទួលស្គាល់ថា ការប្រជែងកៅអីលេងជាមួយរៀមច្បងគឺជារឿងពិបាក តែខ្លួនតាំងចិត្តនឹងធ្វើឲ្យបានល្អដើម្បីទាក់ភ្នែកគ្រូបង្វឹកដាក់ខ្លួនលេង។ អ្វីដែលពិសេស សារ ទី បានសម្ដែងការត្រេកអរ និងរីករាយជាខ្លាំង ដែលខ្លួនបានសម្រេចក្ដីស្រម៉ៃជាប់ជម្រើសជាតិពេលនេះ។
ដោយសារនេះជាលើកដំបូងដែល សារ ទី ត្រូវបានកោះហៅចូលជម្រើសជាតិដូច្នេះទោះបីបានលេង ឬមិនបានលេងក៏ខ្លួនមិនបាក់ទឹកចិត្តដែរ។ ផ្ទុយទៅវិញគេនឹងកាន់តែខិតខំប្រឹងប្រែងហ្វឹកហាត់បន្ថែមទៀត ដើម្បីស្រង់បទពិសោធន៍ និងមានឱកាសជាប់ជម្រើសជាតិនាពេលក្រោយ។ សូមបញ្ជាក់ថា សារ ទី រួមជាមួយកីឡាករជម្រើសជាតិកម្ពុជា ២៩រូបផ្សេងទៀតនឹងត្រូវធ្វើដំណើរទៅសិង្ហបុរីនាថ្ងៃទី២ ខែធ្នូស្អែកនេះដើម្បីត្រៀមការប្រកួតពានរង្វាន់ AFF Suzuki Cup 2020 ដែលគ្រោងដំណើរការប្រកួតពីថ្ងៃទី៥ ខែធ្នូដល់ថ្ងៃទី១ ខែមករា ឆ្នាំ២០២២ ខាងមុខ ខណៈជំនួបដំបូងកម្ពុជានឹងត្រូវជួបម៉ាឡេស៊ីនាថ្ងៃទី៦-ធ្នូដើមសប្ដាហ៍ក្រោយ។ បេសកកម្មនេះ ក្រុមគោព្រៃកម្ពុជាស្ថិតក្នុងពូល B ជាមួយម៉ាឡេស៊ី វៀតណាម ឥណ្ឌូនេស៊ី និងឡាវ ខណៈពូល A មានម្ចាស់ផ្ទះសិង្ហបុរី ថៃ មីយ៉ាន់ម៉ា ហ្វីលីពីន និងទីម័រខាងកើត ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
