អ្នកនាំពាក្យរបស់ក្រសួងការពារជាតិចិន លោក Wu Qian កាលពីថ្ងៃព្រហស្បតិ៍ (២៧ មីនា) បានអះអាងសារជាថ្មីនូវការតាំងចិត្ត និងសមត្ថភាពរបស់យោធាចិន ក្នុងការរារាំងការប៉ុនប៉ងផ្តាច់ខ្លួនណាមួយសម្រាប់ "ឯករាជ្យភាពកោះតៃវ៉ាន់" ជាការឆ្លើយតបនឹងសេចក្តីថ្លែងការណ៍ផ្តាច់ខ្លួនថ្មីៗរបស់មេដឹកនាំតៃវ៉ាន់ លោក Lai Ching-te។

លោក Wu បានលើកឡើងថា សមយុទ្ធនាពេលថ្មីៗនេះរបស់បញ្ជាការភាគខាងកើត នៃកងទ័ពរំដោះប្រជាជនចិន (PLA) នៅក្នុងតំបន់ជុំវិញកោះតៃវ៉ាន់ គឺជាវិធានការស្របច្បាប់ និងចាំបាច់ ដែលបម្រើជាការដាក់ទណ្ឌកម្ម និងការទប់ស្កាត់ ប្រឆាំងនឹង "ឯករាជ្យតៃវ៉ាន់" ការផ្ដាច់ខ្លួន និងការព្រមានយ៉ាងម៉ឺងម៉ាត់ ចំពោះកងកម្លាំងជ្រៀតជ្រែកពីខាងក្រៅ។

ជាការឆ្លើយតបទៅនឹងវោហាសាស្ត្រផ្តាច់ខ្លួនរបស់លោក Lai — ដែលអះអាងថា ភាគីទាំងពីរនៃច្រកសមុទ្រតៃវ៉ាន់ "មិនមែនមេ និងកូនចៅគ្នានោះទេ" និងសំដៅលើចិនថាជា "កម្លាំងអរិភាពបរទេស" — លោក Wu បានដកស្រង់ឃ្លាដែលចិនបុរាណតែងនិយាយថា "ពេលឋានសួគ៌ហៀបនឹងបំផ្លាញនរណាម្នាក់ ដំបូងឡើយនឹងធ្វើឱ្យអ្នកនោះវង្វេងជាមុនសិន"។

អ្នកនាំពាក្យរូបនេះបន្តថា យោធាចិននៅតែត្រៀមខ្លួនជាស្រេច ហើយអាចប្រយុទ្ធ និងឈ្នះបានគ្រប់ពេលវេលា ហើយនឹងចាត់វិធានការយ៉ាងម៉ឺងម៉ាត់ ដើម្បីរារាំងការប៉ុនប៉ងផ្តាច់ខ្លួនណាមួយ។ លោកបន្ថែមថា "តៃវ៉ាន់គឺជាផ្នែកមួយនៃប្រទេសចិន ហើយកោះនេះមិនដែលក្លាយជាប្រជាជាតិមួយឡើយ មិនថានៅក្នុងអតីតកាល បច្ចុប្បន្ន ឬថ្ងៃអនាគតនោះទេ"៕