ប្រជាជនមូស្លីមឥណ្ឌូណេស៊ី រាប់លាននាក់ កំពុងចាកចេញពីរដ្ឋធានីហ្សាកាតា ត្រឡប់ទៅស្រុកកំណើតវិញនៅមុនថ្ងៃបុណ្យ Eid al-Fitr។

រថយន្តរាប់ពាន់គ្រឿង ត្រូវបានគេមើលឃើញកំពុងតម្រៀបជួរនៅបញ្ជរបង់ប្រាក់នៅក្រុង Cikampek ដែលត្រូវបានកំណត់សម្រាប់ផ្លូវធ្វើចរាចរណ៍ចេញពីទីក្រុងហ្សាការតា ដើម្បីបញ្ចៀសការកកស្ទះចរាចរណ៍កាលពីថ្ងៃព្រហស្បតិ៍ ខណៈចំនួនយានយន្តត្រូវបានគេរំពឹងថានឹងកើនឡើងក្នុងរយៈពេលប៉ុន្មានថ្ងៃខាងមុខនេះ។

ស្ថានីយ៍រថភ្លើង Pasar Senen នៅទីក្រុងហ្សាកាតា ដែលជាមជ្ឈមណ្ឌលសំខាន់តភ្ជាប់ទីក្រុងនានានៅទូទាំងកោះជ្វា បានឃើញការកើនឡើង១០% ក្នុងការធ្វើដំណើរតាមរថភ្លើងនៅឆ្នាំនេះ បើប្រៀបធៀបនឹងឆ្នាំមុន នេះបើយោងតាមក្រុមហ៊ុន KAI ជាក្រុមហ៊ុនរថភ្លើងជាតិរបស់ប្រទេសឥណ្ឌូនេស៊ី។

ក្រសួងដឹកជញ្ជូនបាននិយាយថា ប្រជាជនប្រហែល១៤៦លាននាក់ នៅទូទាំងប្រទេស ត្រូវបានគេរំពឹងថានឹងធ្វើដំណើរក្នុងអំឡុងពេលថ្ងៃឈប់សម្រាកមួយសប្តាហ៍ក្នុងឆ្នាំនេះ ដែលទាបជាង២៤% បើធៀបទៅនឹងរយៈពេលដូចគ្នាកាលពីឆ្នាំមុន។