មហាសេដ្ឋីបច្ចេកវិទ្យា លោក Elon Musk ដែលត្រូវបានប្រធានាធិបតីសហរដ្ឋអាមេរិកលោក Donald Trump ចាត់ទុកថាជាអ្នកកាត់បន្ថយការចំណាយរបស់លោក បាននិយាយកាលពីថ្ងៃព្រហស្បតិ៍ នៅក្នុងបទសម្ភាសន៍របស់សារព័ត៌មាន Fox News ថា គោលដៅរបស់លោកក្នុងការកាត់បន្ថយការចំណាយសហព័ន្ធចំនួន១សែនកោដិដុល្លារ អាចសម្រេចបានដោយមិនប៉ះពាល់ដល់សេវានានាឡើយ។

លោក Musk បានប្រាប់សារព័ត៌មាន Fox News កម្មវិធី«របាយការណ៍ពិសេសជាមួយលោក Bret Baier» ថា លោកមានទំនុកចិត្តថាក្រសួងប្រសិទ្ធភាពរដ្ឋាភិបាលរបស់លោក អាចរកឃើញប្រាក់សន្សំបាន ១សែនកោដិដុល្លារ ដែលកាត់បន្ថយកម្រិតការចំណាយសរុបរបស់សហព័ន្ធបច្ចុប្បន្នប្រហែល ៧សែនកោដិដុល្លារធ្លាក់មកត្រឹម៦សែនកោដិដុល្លារ។

ក្រសួងកាត់បន្ថយការចំណាយរបស់លោក Musk បានប៉ាន់ប្រមាណថា ក្រសួងបានសន្សំប្រាក់អ្នកបង់ពន្ធអាមេរិកចំនួន១១៥ពាន់លានដុល្លារគិតត្រឹមថ្ងៃទី២៤ ខែមីនា តាមរយៈសកម្មភាពជាបន្តបន្ទាប់ រួមមានទាំងការកាត់បន្ថយកម្លាំងពលកម្ម ការលក់ទ្រព្យសម្បត្តិ និងការលុបចោលកិច្ចសន្យា។

អ្នកជំនាញផ្នែកថវិកានិយាយថា លោក Musk មិនអាចឈានដល់គោលដៅរបស់លោកដោយមិនប៉ះពាល់ដល់កម្មវិធីផ្តល់សិទ្ធិ ដូចជាសន្តិសុខសង្គម ដែល លោក Trump បានសន្យាថានឹងមិនកាត់បន្ថយនោះទេ។