អង្គការសង្គមអឌ្ឍចន្ទក្រហមប៉ាឡេស្ទីន បាននិយាយកាលពីថ្ងៃព្រហស្បតិ៍ថា បុគ្គលិករបស់ខ្លួនជាច្រើននាក់ បានបាត់ខ្លួន អស់រយៈពេលជិត ៥ថ្ងៃហើយ នៅតំបន់ហ្កាហ្សាស្ទ្រីប ភាគខាងត្បូង អំឡុងពេលការវាយលុករបស់អ៊ីស្រាអែល។

អង្គការអឌ្ឍចន្ទក្រហម បានជំរុញសហគមន៍អន្តរជាតិ ឲ្យធ្វើអន្តរាគមន៍ និងអនុញ្ញាតឲ្យក្រុមជួយសង្គ្រោះ ចូលទៅកាន់តំបន់ Tel Sultan ក្នុងទីក្រុង Rafah ដើម្បីកំណត់ជោគវាសនារបស់ក្រុមគ្រូពេទ្យ ដែលកំពុងបាត់ខ្លួននេះ។

អង្គការនេះ បានសម្តែងការព្រួយបារម្ភចំពោះសុវត្ថិភាពរបស់បុគ្គលិក ៩នាក់របស់ខ្លួន នៅក្នុងទីក្រុង Rafah ក្នុងរយៈពេល ៥ថ្ងៃ កន្លងទៅនេះ ហើយបានឲ្យអាជ្ញាធរអ៊ីស្រាអែលទទួលខុសត្រូវទាំងស្រុងចំពោះជោគវាសនារបស់ពួកគេ។

អ៊ីស្រាអែលបានបន្តយុទ្ធនាការយោធារបស់ខ្លួន នៅតំបន់ហ្កាហ្សាស្ទ្រីប កាលពីសប្តាហ៍មុន បន្ទាប់ពីការដួលរលំនៃកិច្ចព្រមព្រៀងឈប់បាញ់ជាមួយក្រុមហាម៉ាស។ ទីភ្នាក់ងារសារព័ត៌មាន WAFA បានរាយការណ៍ថា ក្នុងរយៈពេល ២៤ ម៉ោងកន្លងមកនេះ យ៉ាងហោចណាស់មានជនជាតិប៉ាឡេស្ទីន ២៥នាក់ ត្រូវបានសម្លាប់ និង ៨២នាក់ បានរងរបួស នៅក្នុងតំបន់ឆ្នេរនេះ ខណៈដែលការវាយប្រហាររបស់អ៊ីស្រាអែល នៅតែបន្ត។

ក្រសួងសុខាភិបាលប៉ាឡេស្ទីន បានរាយការណ៍ថា មានអ្នកស្លាប់ចំនួន ៥០.២០៨ នាក់ និងរបួស ១១៣.៩១០នាក់ ចាប់តាំងពីចុងឆ្នាំ ២០២៣ ដោយជនរងគ្រោះភាគច្រើនជាស្ត្រី និងកុមារ។ នេះបើយោងតាមសារព័ត៌មាន WAFA។