គ្រោះរញ្ជួយដីកម្រិត ៧,៧រ៉ិចទ័រ ដែលចំណុចកណ្ដាលកើតមាននៅប្រទេសមីយ៉ាន់ម៉ា បានអង្រួនរដ្ឋធានីបាងកក ប្រទេសថៃ និងផ្នែកខ្លះនៃវៀតណាម នាថ្ងៃសុក្រ ២៨ មីនា នេះ បណ្តាលឱ្យអគារជាច្រើនត្រូវរង្គើ ហើយមនុស្សម្នារត់ជម្លៀសខ្លួនយ៉ាងភ័យស្លន់ស្លោ ដោយរហូតមកទល់ពេលនេះ មិនមានអ្នករបួស ឬការខូចខាតធំដុំត្រូវរាយការណ៍ផ្លូវការនោះទេ។

ទីភ្នាក់ងារស្ទាបស្ទង់ភូគ្ពសាស្ត្រអាមេរិក និងមជ្ឈមណ្ឌលភូមិសាស្ត្រ GFZ របស់អាល្លឺម៉ង់ បាននិយាយថា ការរញ្ជួយដីនៅពេលថ្ងៃត្រង់នេះ គឺជាកម្រិតរាក់ ១០គីឡូម៉ែត្រប៉ុណ្ណោះ ជាមួយនឹងចំណុចកណ្តាលនៃរញ្ជួយកើតមាននៅមីយ៉ាន់ម៉ា ដែលនៅជិតខាង នេះបើយោងតាមរបាយការណ៍បឋម។

មិនទាន់មានរបាយការណ៍ភ្លាមៗពីឥទ្ធិពលនៃការរញ្ជួយដីនៅមីយ៉ាន់ម៉ាទេ។

តំបន់បាងកកដ៏ធំនេះ ជាកន្លែងរស់នៅរបស់ប្រជាជនជាង ១៧លាននាក់ ដែលភាគច្រើននៅក្នុងផ្ទះល្វែងខ្ពស់ៗ។ សំឡេងរោទិ៍ប្រកាសអាសន្នបានលាន់លឺក្នុងអគារ ខណៈការរញ្ជួយដីបានវាយប្រហារនៅម៉ោងប្រហែល ១:៣០នាទីរសៀល ហើយអ្នកស្រុកដែលមានការភ្ញាក់ផ្អើល ត្រូវបានជម្លៀសចេញពីជណ្តើរនៃអគារខុនដូ និងសណ្ឋាគារខ្ពស់ៗនៅកណ្តាលទីក្រុងបាងកក។

នៅវៀតណាម ប្រជាជនដែលរស់នៅជាន់ខ្ពស់ក្នុងអាផាតមិនជាច្រើន ក្នុងសង្កាត់ផ្សេងៗគ្នា​នៅទូទាំងទីក្រុងហាណូយ ចម្ងាយជាង ១.០០០គីឡូម៉ែត្រពីចំណុចកណ្តាលរញ្ជួយដី មានអារម្មណ៍ដឹងថាគ្រឿងសង្ហារឹមរបស់ពួកគេរង្គោះរង្គើក្នុងពេលខ្លី។

យោងតាមសាក្សីនៅលើបណ្តាញសង្គម - ដែលមិនទាន់ត្រូវបានបញ្ជាក់ផ្លូវការនៅឡើយ - បានឱ្យដឹងថា ស្ពាន និងអគាររងការខូខាតដោយផ្នែក ហើយមានវីដែអូបង្ហាញពីអគាររង្គើនៅបាងកក ដោយមានការរាយកាណ៍ខ្លះប្រាប់ថា អគារជាច្រើនក៏បានដួលរលំនៅបាងកកផងដែរ៕