មនុស្សរាប់រយនាក់ត្រូវបានគេមើលឃើញរត់ចេញពីអគារ ហើយបានជួបជុំគ្នាតាមដងផ្លូវនៅកណ្តាលទីក្រុងបាងកក នាថ្ងៃនារសៀលថ្ងៃសុក្រនេះ ក្រោយការរញ្ជួយដីដ៏ខ្លាំងក្លាមួយបានវាយប្រហារប្រទេសជិតខាងមីយ៉ាន់ម៉ា ។

យោងតាមការអះអាងរបស់សាក្សី បានឲ្យដឹងថា អគារជាច្រើនខ្នងបានបាក់រលំនៅទីក្រុងធំបំផុតទី ២ Mandalay របស់មីយ៉ាន់ម៉ា ។ អគារខ្ពស់ដែលស្ថិតក្រោមការសាងសង់ បានបាក់រលំនៅទីក្រុងបាងកក រាជធានីប្រទេសថៃ ខណៈអគារជាច្រើនទៀត បានអង្រួនផងដែរ ។ ចំណែកឯការជួញដូរផ្សារភាគហ៊ុន បានបញ្ឈប់ ។

មន្ទីរស្ទង់ភូគព្ភសាស្រ្តសហរដ្ឋអាមេរិក(USGS) បាននិយាយថា មាននូវការរញ្ជួយដីកម្រិត ៧,៧រ៉ិចទ័រ ហើយនិងក្នុងជម្រៅដី ១០គ.ម ។

យោងតាមការអះអាងរបស់ USGS បានឲ្យដឹងថា ចំណុចកណ្តាលនៃការរញ្ជួយដីនេះ ស្ថិតនៅចម្ងាយប្រហែល ១៧គ.មពីរដ្ឋធានីបុរាណ Mandalay របស់មីយ៉ាន់ម៉ា ដែលមានពលរដ្ឋរស់នៅប្រហែល ១,២លាននាក់ ។

ខណៈពេលនោះដែរ នាយករដ្ឋមន្រ្តីថៃលោកស្រី Paetongtarn Shinawatra មាននូវជំនួបបន្ទាន់មួយ ក្រោយការរញ្ជួយដ៏ខ្លាំងក្លាវាយប្រហារប្រទេសមីយ៉ាន់ម៉ា ។ 

យោងតាមការអះអាងរបស់អ្នកស្រុក និងទីភ្នាក់ងារគ្រោះមហន្តរាយថៃ បានឲ្យដឹងថា ភាពរំញ័រមានអារម្មណ៍នៅទូទាំងប្រទេសថៃ រួមទាំងនៅទីក្រុងភាគខាងជើងឈៀងម៉ៃផងដែរ ។

ដោយឡែក អ្នកប្រើប្រាស់បណ្តាញព័ត៌មានសង្គមចិន ននៅខេត្ត Yunnan និងខេត្ត Guangxi ដែលជាប់ព្រំដែនជាមួយមីយ៉ាន់ម៉ា និយាយថា ពួកគេមានអារម្មណ៍ថាមានការរញ្ជួយដីដ៏ខ្លាំងក្លាមួយ ៕