អនុប្រធានាធិបតីទី១ និងជាមេដឹកនាំប្រឆាំងដ៏ធំរបស់ប្រទេសស៊ូដង់ខាងត្បូង គឺលោក Riek Machar ត្រូវបានដាក់ឲ្យស្ថិតនៅក្រោមការឃុំខ្លួនក្នុងផ្ទះ ដោយចំណាត់ការនេះបានជំរុញឲ្យមានការព្រមានពីអង្គការសហប្រជាជាតិ (UN) ថា ប្រទេសនេះកំពុងប្រឈមនឹងហានិភ័យនៃការវិលទៅរកការរីករាលដាលជម្លោះជាថ្មី។

គណបក្សរបស់លោក Machar បានឲ្យដឹងថា ការចាប់ខ្លួនរបស់លោក បានធ្វើឲ្យដួលរលំជាធរមាននូវកិច្ចព្រមព្រៀងសន្តិភាពដែលបានបញ្ចប់សង្រ្គាមស៊ីវិលឆ្នាំ២០១៣-២០១៨។

តាមរយៈសេចក្តីថ្លែងការណ៍មួយ នៅលើបណ្ដាញសង្គម Facebook ប្រមុខស្តីទីនៃគណៈកម្មាធិការទំនាក់ទំនងបរទេសនៃចលនារំដោះប្រជាជនស៊ូដង់ ក្នុងបក្សប្រឆាំង (SPLM-IO) គឺលោក Reath Muoch Tang បានឲ្យដឹងថា រដ្ឋមន្ត្រីក្រសួងការពារជាតិ និងជាប្រមុខសន្តិសុខជាតិ បានអមដំណើរក្បួនរថយន្តប្រដាប់អាវុធជាង ២០គ្រឿង ដែលបានសម្រុកចូលគេហដ្ឋានរបស់លោក។ នៅទីនោះ អង្គរក្សរបស់លោកត្រូវបានដកហូតអាវុធ ហើយដីកាចាប់ខ្លួន ត្រូវបានចេញ «ក្រោមការចោទប្រកាន់មិនច្បាស់លាស់»។

គណៈកម្មាធិការសិទ្ធិមនុស្សរបស់ UN ប្រចាំនៅស៊ូដង់ខាងត្បូង បានឲ្យដឹងនៅក្នុងសេចក្តីថ្លែងការណ៍មួយថា ការចាប់ខ្លួននេះ រួមជាមួយនឹងការកើនឡើងនូវការប៉ះទង្គិចគ្នា ដោយប្រដាប់អាវុធ និងការរាយការណ៍ពីការវាយប្រហារលើជនស៊ីវិល «ជាសញ្ញាប៉ះពាល់យ៉ាងធ្ងន់ធ្ងរដល់ដំណើរការសន្តិភាព និងការគំរាមកំហែងដោយផ្ទាល់ដល់ជីវិតមនុស្សរាប់លាននាក់»។

សេចក្ដីថ្លែងការណ៍បានបន្ថែមថា៖ «ការបរាជ័យក្នុងការបន្តរក្សាការការពារ ដែលមានចែងនៅកិច្ចព្រមព្រៀងសន្តិភាព ក្នុងនោះរួមមានទាំងសេរីភាពនៃការធ្វើដំណើរ ការចូលរួមនយោបាយ និងការបញ្ឈប់អរិភាព នឹងនាំទៅរកការវិលត្រលប់ដ៏មហន្តរាយនៃការការសង្រ្គាមវិញ»៕