​បាល់ទាត់៖ ​ក្លិប​អ្នកមាន​ថ្មី Newcastle United នៅតែ​រក​ជ័យជំនះ​ដំបូង​មិនបាន​ក្នុង​រដូវ​កាល​នេះ​នៅ​ក្រប​ខណ្ឌ English Premier League គិត​ត្រឹម​សប្តាហ៍​ទី១៤ ទៅ​ហើយ​បន្ទាប់ពី Norwich តាម​ស្មើ​វិញ​នៅ​ចុង​ម៉ោង​។ ​​Newcastle ក្រោម​ការដឹកនាំ​របស់​អ្នកចាត់ការ​ថ្មី Eddie Howe ប្រកួត​ដំបូង​ក្នុង​ទឹកដី​ខ្លួនឯង​តែ​ចាប់ផ្តើម​បានតែ ៩នាទី Ciaran Clark ត្រូវបាន​បណ្តេញចេញ​ក្រោយ​កំហុស​លើ​ខ្សែប្រយុទ្ធ Teemu Pukki​។

​​ថ្វីបើ​គ្នា​តិចជាង​មែន Newcastle នៅតែ​អាច​រក​គ្រាប់​នាំមុខ​មុន​បាន​នៅ​នាទី​ទី៦១ ដោយ​បាល់​ពិន័យ ១១ម៉ែត្រ​របស់ Callum Wilson ក្រោយ​កំហុស​របស់ Billy Gilmour​។ ​​យ៉ាងណាក្តី​ក្រុម​របស់លោក Eddie Howe នៅតែ​មិនអាច​រក្សា​ការនាំ​មុខ​បាន​ពោលគឺ​ខ្សែប្រយុទ្ធ​ហ្វាំ​ង​ឡង់ Teemu Pukki ជា​អ្នក​តាម​ស្មើ​ឱ្យ Norwich នៅ​នាទី​ទី៧៩​។ ​​លទ្ធផល​នេះ​ធ្វើឱ្យ Newcastle បន្ត​ឈរ​បាត​តារាង​ស្វែងរក​ជ័យជំនះ​ដំបូង​មិនបាន​នៅឡើយ​ក្រោយ​លេង​បាន ១៤សប្តាហ៍​មាន​ត្រឹម ៧ពិន្ទុ​តាម​ពីក្រោយ Norwich ២ពិន្ទុ​។ ​​មួយ​ប្រកួត​ទៀត​យប់មិញ Leeds United រកបាន​បី​ពិន្ទុ​លើក​ទី៤ ប៉ុណ្ណោះ​ក្នុង​រដូវ​កាល​នេះ​ដើម្បី​ឡើងមក​ឈរ​លេខ ១៥ ក្នុង​តារាង​មាន ១៥ពិន្ទុ​។ ​​គ្រាប់​ជ័យជំនះ​របស់ Leeds ត្រូវ​រង់ចាំ​ដល់​នាទី​ទី៩០+៣ ទៅហើយ​ដោយ​បាល់ ១១ម៉ែត្រ​របស់ Raphinha ក្រោយ​កំហុស​បាល់​ប៉ះ​ដៃ​របស់​ខ្សែការពារ Crystal Palace, Marc Guehi​។​ ​ចំណែក Crystal Palace បាន​ធ្លាក់​មក​លេខ ១២ ក្នុង​តារាង​មាន ១៦ពិន្ទុ​ពី​ការប្រកួត ១៤លើក​៕

​អត្ថបទ​៖​នាង សុភា​វុ​ធ