គ្រោះរញ្ជួយដីកម្រិត ៧,៧រ៉ិចទ័រ បានកើតមាននៅសហភាពមីយ៉ាន់ម៉ា នាថ្ងៃសុក្រ (ទី២៨ ខែមីនា) នេះ ដោយបានធ្វើឲ្យមានការរញ្ជួយដ៏ខ្លាំងក្លា នៅទូទាំងប្រទេសថៃ បង់ក្លាដែស និងភាគខាងកើតប្រទេសឥណ្ឌា។ រដ្ឋាភិបាលថៃ បានប្រកាសគ្រាអាសន្ន ក្នុងទីក្រុងបាងកក ខណៈអាជ្ញាធរកំពុងវាយតម្លៃពីការខូចខាតអគារ និងហេដ្ឋារចនាសម្ព័ន្ធនានា។

នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត់ (Paetongtarn Shinawatra) បានបញ្ជាក់ពីវិធានការគ្រាអាសន្ននេះ បន្ទាប់ពីមានរបាយការណ៍អំពីការដួលរលំនៃសំណង់នានា និងការភ័យស្លន់ស្លោគ្រប់ទីកន្លែង។ ឧប្បត្តិហេតុដ៏ធំបំផុតមួយ គឺការដួលរលំអគារកម្ពស់ ៣០ជាន់ដែលកំពុងស្ថិតក្នុងដំណើរការសាងសង់ នៅភាគខាងជើងនៃរាជធានីនេះ ហើយបើតាមសេចក្ដីរាយការណ៍ បានឲ្យដឹងថា មានមនុស្សរាប់សិបនាក់ជាប់នៅក្នុងនោះ។

យោងតាមស្ថាប័នស្ទាបស្ទង់ភូគព្ភសាស្ត្រសហរដ្ឋអាមេរិក (USGS) បានឲ្យដឹងថា ចំណុចកណ្ដាលនៃគ្រោះរញ្ជួយដីមានចម្ងាយ ១៦គីឡូម៉ែត្រ នៅចន្លោះភាគខាងជើង និងភាគពាយព្យនៃទីក្រុង Sagaing របស់សហភាពមីយ៉ាន់ម៉ា ដោយមានជម្រៅ ១០គីឡូម៉ែត្រ។

ក្រុមឆ្លើយតបគ្រាអាសន្ន នៅទីក្រុងបាងកក កំពុងវាយតម្លៃការខូចខាតរចនាសម្ព័ន្ធ ហើយអ្នកស្រុកត្រូវបានណែនាំឲ្យចៀសឲ្យឆ្ងាយពីអគារដែលខូចខាត និងសំណង់អគារខ្ពស់ៗ។ នៅឯប្រទេសបង់ក្លាដែស និងភាគខាងកើតប្រទេសឥណ្ឌា អាជ្ញាធរកំពុងតាមដានស្ថានការណ៍យ៉ាងដិតដល់ ទោះបីជាមិនតម្រូវឲ្យមានអន្តរាគមន៍ភ្លាមៗក៏ដោយ។

ដោយរលករញ្ជួយត្រូវបានរំពឹងថា កើតមាន បណ្ដាមន្ត្រីទាំងនៅប្រទេសថៃ មីយ៉ាន់ម៉ា បង់ក្លាដែស និងឥណ្ឌា មានការប្រុងប្រយ័ត្នខ្ពស់ ខណៈដែលពួកគេធ្វើការ ដើម្បីធានាសុវត្ថិភាពសាធារណៈ បន្ទាប់ពីមានគ្រោះរញ្ជួយដីនេះ៕