ទីភ្នាក់ងារទំនាក់ទំនងសាធារណៈអន្តរសេវាកម្ម (ISPR)របស់កងកម្លាំងប្រដាប់អាវុធប៉ាគីស្ថាន បាននិយាយនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ថា យ៉ាងហោចណាស់ភេរវករ ១១នាក់ ត្រូវបានសម្លាប់ នៅក្នុងប្រតិបត្តិការចំនួន ៤ ដាច់ដោយឡែកពីគ្នា នៅក្នុងខេត្ត Khyber Pakhtunkhwa កាលពីថ្ងៃទី២៦-២៧ ខែមីនា។

នៅក្នុងសេចក្តីថ្លែងការណ៍មួយ ប្រព័ន្ធផ្សព្វផ្សាយរបស់យោធានេះ បាននិយាយថា ប្រតិបត្តិការដែលផ្អែកលើព័ត៌មានចារកម្ម ត្រូវបានធ្វើឡើងដោយកងកម្លាំងសន្តិសុខ នៅក្នុងតំបន់ Mir Ali នៃ ស្រុក Waziristan ភាគខាងជើង។

«ក្នុងអំឡុងពេលប្រតិបត្តិការ កងទ័ពផ្ទាល់ បានចូលទៅក្នុងទីតាំងរបស់ក្រុមភេរវករ khwarij យ៉ាងមានប្រសិទ្ធភាព ហើយជាលទ្ធផល ភេរវករ Khwarij ចំនួន ៥នាក់ ត្រូវបានបញ្ជូនទៅឋាននរក»។

សេចក្តីថ្លែងការណ៍ បានបន្ថែមថា នៅក្នុងប្រតិបត្តិការលើកទី ២ ដែលធ្វើឡើងនៅក្នុងតំបន់ដូចគ្នានោះ ក្រុមសកម្មប្រយុទ្ធ ៣នាក់ទៀត ត្រូវបានកងទ័ពសម្លាប់ដោយជោគជ័យ។

ទីភ្នាក់ងារទំនាក់ទំនងសាធារណៈអន្តរសេវាកម្ម (ISPR) បាននិយាយថា នៅក្នុងការជួបគ្នាមួយផ្សេងទៀត ដែលបានកើតឡើង នៅក្នុងតំបន់ទូទៅ Miran Shah នៃស្រុក Waziristan ខាងជើង កងទ័ពបានសម្លាប់ភេរវករពីរនាក់ទៀត។

ក្នុងប្រតិបត្តិការលើកទី៤ ដែលធ្វើឡើងដោយកម្លាំងសន្តិសុខនៅតំបន់ទូទៅ Daraban នៃស្រុក Dera Ismail Khan ភេរវករម្នាក់ ត្រូវបានបញ្ជូនទៅឋាននរក។