មនុស្សយ៉ាងហោច ២៥នាក់ បានស្លាប់ ក្នុងការរញ្ជួយដី ២លើកជាប់ៗគ្នានៅមីយ៉ាន់ម៉ានាថ្ងៃសុក្រនេះ ខណៈពេលដែលរដ្ឋាភិបាលយោធា ស្វែងរកជំនួយអន្តរជាតិ ។

មន្ទីរស្ទង់ភូគព្ភសាស្រ្តសហរដ្ឋអាមេរិក(USGS) បាននិយាយនៅថ្ងៃសុក្រនេះថា សហភាពមីយ៉ាន់ត្រូវបានអង្រួនដោយការរញ្ជួយដី ២លើកជាប់ៗគ្នា ក្នុងកម្រិត ៧,៧រ៉ិចទ័រ និងកម្រិត ៦,៤រ៉ិចទ័រ និងក្នុងជម្រៅដី ១០គ.ម ហើយចំណុចកណ្តាលរបស់វា ស្ថិតនៅចម្ងាយប្រហែល ១៧គ.មពីរដ្ឋធានី Mandalay ដែលមានពលរដ្ឋរស់នៅប្រហែល ១,២លាននាក់ ។

សារព័ត៌មានក្នុងស្រុក Khit Thit រាយការណ៍ថា មនុស្សយ៉ាងហោច ១០នាក់ បានស្លាប់ពេលដែលព្រះវិហារមួយខ្នងបានបាក់នៅទីក្រុងម៉ាន់ដាឡេ ។

ការរញ្ជួយដីនេះដែរ បណ្តាលឲ្យមានការខូចខាតទ្រង់ទ្រាយធំដល់អគារ រួមទាំងកំផែងព្រះបរមរាជវាំងក្រុងម៉ាន់ដាឡេផងដែរ ។

រចនាសម្ព័ន្ធជាច្រើននៅតំបន់ម៉ាន់ដាឡេ រងការបាក់រលំ ខណៈផ្លូវជាច្រើនខ្សែដែលតភ្ជាប់ទីក្រុងម៉ាន់ដាឡេ ទៅកាន់ទីក្រុងយ៉ង់ហ្គោន រងការខូចខាត ឬត្រូវបិទ ធ្វើឲ្យអាក់ខានដល់ការដឹកជញ្ជូន ។

ក្រុមអ្នកធ្វើសេចក្តីរាយការណ៍របស់ទីភ្នាក់ងារព័ត៌មានស៊ីនហួដែលប្រចំាការនៅទីក្រុងយ៉ង់ហ្គោន រាយការណ៍ថា ភាពរំញ័រខ្លាំងក្លានៅក្នុងរដ្ឋធានីណៃពិដោ និងទីក្រុងធំបំផុតយ៉ង់ហ្គោន ។ សាលារៀនមួយចំនួន និងអគារការិយាល័យ ត្រូវបានគេរាយការណ៍ថា រងការខូចខាតផងដែរនៅក្នុងទីក្រុងណៃពិដោ ។

ដោយឡែកនៅប្រទេសថៃវិញ មនុស្សយ៉ាងហោច ៣នាក់ បានស្លាប់ ខណៈមនុស្ស ៨១នាក់ផ្សេងទៀត ទ្រូវបានគេរាយការណ៍ថាបានបាត់ខ្លួន ក្រោយអគារខ្ពស់កំពុងសាងសង់ បាក់រលំនៅទីក្រុងបាងកក ដោយសារការរញ្ជួយដីនៅសហភាពមីយ៉ាន់ម៉ានេះ ៕