នាយករដ្ឋមន្រ្តីអេស្ប៉ាញ លោក Pedro Sanchez នៅថ្ងៃសុក្រ (ទី២៨ ខែមីនា) នេះ បានជំរុញឲ្យសហរដ្ឋអាមេរិកគិតឡើងវិញនូវការដំឡើងពន្ធថ្មីលើទំនិញនាំចូលពីអឺរ៉ុប និងបើកការសន្ទនាជាមួយគណៈកម្មការអឺរ៉ុប ដើម្បី «បញ្ឈប់វិធានការមិនសមហេតុសមផលនេះ»។

លោកប្រធានាធិបតីអាមេរិក Donald Trump កាលពីថ្ងៃពុធ បាននិយាយថា សហរដ្ឋអាមេរិក នឹងយកពន្ធនាំចូល ២៥ភាគរយលើរថយន្តទាំងអស់។

កាលពីថ្ងៃព្រហស្បតិ៍ គណៈកម្មការអឺរ៉ុប បានលើកឡើងថា សហភាពអឺរ៉ុប កំពុងរៀបចំការឆ្លើយតប «ខ្លាំងក្លា និងសមស្របតាមកម្រិត»។

ក្នុងសុន្ទរកថា នៅឯទីក្រុងម៉ាឌ្រីដ លោក Sanchez បាននិយាយថា៖ «ថ្ងៃនេះ ពីទីនេះ ខ្ញុំចង់ធ្វើការអំពាវនាវម្តងទៀតទៅកាន់រដ្ឋបាលអាមេរិក ឲ្យគិតគូឡើងវិញ ហើយបើកការសន្ទនាជាមួយគណៈកម្មការអឺរ៉ុប និងបញ្ឈប់វិធានការមិនសមហេតុសមផលនេះ»៕