កងទ័ពស៊ូដង់ បានប្រកាសថា ពួកគេបានបោសសម្អាតក្រុមយុទ្ធជនរបស់កងកម្លាំងគាំទ្ររហ័ស (RSF) ចេញពីរដ្ឋធានី Khartoum រយៈពេលជិត ២ឆ្នាំក្រោយបាត់បង់ទីក្រុងមួយនេះ ។

លោក Nabil Abdullah គឺជាអ្នកនាំពាក្យកងទ័ពស៊ូដង់ និយាយថា នៅថ្ងៃនេះ កងកម្លាំងរបស់ពួកយើង បានបោសសម្អាតក្រុមកាកសំណល់ចុងក្រោយរបស់កងកម្លាំង RSF ចេញពីទីក្រុង Khartoum ។

នៅពាក់កណ្តាលសប្តាហ៍នេះដែរ មេបញ្ជាការកងទ័ពស៊ូដង់លោក Abdel Fattah al-Burhan បានធ្វើដំណើរតាមឧទ្ធម្ភាគចក្រទៅកាន់អាកាសយានដ្ឋានក្រុង Khartoum មុនពេលបន្តដំណើរទៅកាន់វិមានប្រធានាធិបតី ដើម្បីបញ្ជាក់ថា កងទ័ពស៊ូដង់គ្រប់គ្រងបានវិញហើយបេះដូងរបស់រដ្ឋធានីមួយនេះ ។

រូបភាពវីដេអូឃ្លីបបញ្ចេញដោយក្រុមប្រឹក្សាកាន់អំណាចរបស់លោក ឃើញរូបលោក al-Burhan ដើរជុំវិញវិមានប្រធានាធិបតី និងតំបន់ជុំវិញជាមួយមន្រ្តីយោធា ហើយនិងឃើញលោក Burhan ឡើងជិះឧទ្ធម្ភាគចក្រ ។

ដំណើរទស្សនកិច្ចនេះ បានកើតមានឡើង ពេលដែលកងទ័ពស៊ូដង់ រុញច្រានគូប្រជែងរបស់ខ្លួនដែលជាកងកម្លាំងគាំទ្ររហ័ស(RSF) ឲ្យចេញពីតំបន់ភាគច្រើននៅក្នុងទីក្រុង Khartoum ។

សេចក្តីថ្លែងការណ៍របស់កងទ័ព បាននិយាយថា ការហោះហើររបស់លោកទៅកាន់អាកាសយានដ្ឋាន គឺជាដំណើរលើកដំបូងដែលបានចុះចតនៅទីនោះ ចាប់តាំងពីផ្ទុះសង្រ្គាមកាលពីខែមេសា ឆ្នាំ ២០២៣ ។

កងទ័ពស៊ូដង់និយាយផងដែរថា ពួកគេដណ្តើមបានការគ្រប់គ្រងមូលដ្ឋានទ័ពសំខាន់របស់កងកម្លាំង RSF ស្ថិតនៅភាគខាងត្បូងរដ្ឋធានី ដែលជាតំបន់កាន់កាប់ធំចុងក្រោយគេរបស់ទាហានប៉ារ៉ាមួយនេះ នៅក្នុងរដ្ឋ Khartoum ៕