ភ្នំពេញ ៖ កងកម្លាំងនៃមជ្ឈមណ្ឌលសកម្មភាពកំចាត់មីនកម្ពុជា (CMAC) រយៈពេល១០ខែ នៅឆ្នាំ២០២១នេះ បានធ្វើការបោសសំអាតគ្រាប់មីន និងគ្រាប់យុទ្ធភ័ណ្ឌមិនទាន់ផ្ទុះ តាមតំបន់នានា បានចំនួនជាង ៨៣លានម៉ែត្រក្រឡា និងរកឃើញគ្រាប់មីនបានជិត ៧ម៉ឺនគ្រាប់ ត្រូវបានកម្ទេចចោល ។

យោងតាមរបាយការណ៍ ដែលបង្ហាញក្នុងកិច្ចប្រជុំក្រុមប្រឹក្សាភិបាលស៊ីម៉ាក់ កាលពីថ្ងៃទី​៣០ ខែវិច្ឆិកាម្សិលមិញ ដើម្បីពិនិត្យវឌ្ឍនភាពការងារ១០ខែ ឆ្នាំ២០២១ និងពង្រាងផែនការ​សមាហរណកម្ម​ឆ្នាំ២០២២ បានឲ្យដឹងថា​ លទ្ធផលការងារគ្រប់មុខព្រួញរបស់​អង្គភាព CMAC ចាប់ពីខែមករា ដល់ខែតុលា បានទទួលលទ្ធផលប្រកបដោយជោគជ័យ ​គួរឲ្យកត់សម្គាល់ បើទោះ​ជាស្ថិតក្នុងបរិបទសកល​ នៃការឆ្លងរាលដាលជំងឺកូវីដ-១៩ក៏ដោយ ។

ខ្លឹមសារនៃកិច្ចប្រជុំ បានបន្ថែមថា លទ្ធផលកិច្ចប្រតិបត្តិការក្នុងរយៈពេល១០ខែនេះ​ បានធ្វើការ រំដោះ​ផ្ទៃ​ដី​រងផល​ប៉ះពាល់ដោយសារគ្រាប់មីន ​និង​សំណល់យុទ្ធភណ្ឌសង្គ្រាម សរុបចំនួនជាង ៨៣លានម៉ែត្រក្រឡា ស្មើនឹង៨៨,១៣ភាគរយ នៃផែនការរយៈពេល១០ខែ ​(មករា-តុលា) ឬស្មើនឹង ៧៣,៤៤ភាគ រយ នៃផែនការប្រចាំឆ្នាំ ។

របាយការណ៍ដដែល បានបន្តថា លទ្ធផលដែលទទួលបាន គឺទាបជាងផែនការមួយផ្នែក ដោយ សារការចល័តក្រុមពហុជំនាញ ​ដែលមានស្រាប់​ ពីការបោសសម្អាត ​ទៅធ្វើការស្រាវជ្រាវចម្ការមីន ឬគ្រាប់វិញ ហើយលទ្ធផលស្រាវជ្រាវកំណត់ចម្ការមីន និងគ្រាប់ថ្មី​សម្រេចបាន៥១៤ទីតាំង ស្មើនឹង​ជាង​៨០លាន ម៉ែត្រក្រឡា ​ដោយកិច្ចប្រតិបត្តិការនេះ ​រុករកឃើញ ​និងកម្ទេចចោលគ្រាប់មីន និង​យុទ្ធភណ្ឌមិនទាន់ផ្ទុះ គ្រប់ប្រភេទ​ចំនួនជាង៦ម៉ឺន៩៩០០គ្រាប់ ព្រមទាំងមានពលរដ្ឋ ទទួលផល​ដោយ​ផ្ទាល់និងដោយប្រយោល​ចំនួនជាង៣ម៉ឺន៦ពាន់គ្រួសារ ។

ក្នុងរយៈពេលដូចគ្នា ការងារផ្សព្វផ្សាយបានធ្វើការអប់រំយល់ដឹងពីគ្រោះថ្នាក់ដោយសារគ្រាប់មីន និង​សំណល់ជាតិផ្ទុះពីសង្គ្រាមដល់ក្រុមគោលដៅ ​បានចំនួនជាង១ម៉ឺន៤ពាន់លើក ស្មើនឹងជាង ៤៨ម៉ឺនខ្នងផ្ទះ មានប្រជាពលរដ្ឋចូលរួមចំនួនជាង៧៨ម៉ឺននាក់។

សម្រាប់ពង្រាងផែនការឆ្នាំ២០២២ ​មានផែនការរំដោះផ្ទៃដីមានបញ្ហាគ្រាប់មីន ​និងសំណល់​យុទ្ធភណ្ឌ​សង្គ្រាម​ ចំនួនប្រមាណ១២៥គីឡូម៉ែត្រក្រឡា ​និង​បន្តពង្រឹង​សមត្ថភាពជាតិ ក្នុងការ​ដោះស្រាយ ​វិបត្តិ​សំណល់​គ្រាប់បែក​ចង្កោម ​និង​សំណល់យុទ្ធភណ្ឌសង្គ្រាម ដើម្បីគាំទ្រសកម្មភាព​មនុស្សធម៌ ​និងការអភិវឌ្ឍរបស់រាជរដ្ឋាភិបាល ​អនុលោមតាមផែនការជាតិ និងការប្តេជ្ញាចិត្តជាមួយ​សហគមន៍អន្តរជាតិ ស្តីពីសម្រេចឱ្យបានអនុសញ្ញាអន្តរជាតិអូតាវ៉ា ត្រឹមចុងឆ្នាំ២០២៥ ៕

អត្ថបទ៖ បាន សុខរិទ្ធិ