វិមានក្រឹមឡាំង នៅថ្ងៃសុក្រ (ទី២៨ ខែមីនា) នេះ បានព្រមានថា ប្រទេសរុស្ស៊ីរក្សាសិទ្ធិក្នុងការដកខ្លួនចេញពីការផ្អាក ដែលសម្របសម្រួលដោយសហរដ្ឋអាមេរិក ពោលគឺជាការព្រមព្រៀងដែលរារាំងមិនឲ្យទីក្រុងមូស្គូ និងទីក្រុងគីវ វាយប្រហារគ្នាទៅវិញទៅមកលើហេដ្ឋារចនាសម្ព័ន្ធថាមពល ប្រសិនបើអ៊ុយក្រែននៅតែបន្តវាយប្រហារគោលដៅបែបនេះ។

គួរបញ្ជាក់ថា សហរដ្ឋអាមេរិកបានប្រកាសកិច្ចព្រមព្រៀងដាច់ដោយឡែកពីគ្នាជាមួយអ៊ុយក្រែន និងរុស្ស៊ី កាលពីថ្ងៃអង្គារដើមសប្ដាហ៍នេះ ដើម្បីផ្អាកការវាយប្រហាររបស់ប្រទេសទាំង២ លើគោលដៅថាមពលរបស់គ្នាទៅវិញទៅមក ជាជំហានដ៏មានសក្តានុពលដែលទីក្រុងវ៉ាស៊ីនតោនសង្ឃឹមថា នឹងនាំទៅដល់បទឈប់បាញ់ពេញលេញ និងកិច្ចចរចាសន្តិភាព ដើម្បីបញ្ចប់សង្រ្គាមរយៈពេល ៣ឆ្នាំ។

ប៉ុន្តែរុស្ស៊ី និងអ៊ុយក្រែន នៅថ្ងៃសុក្រនេះ បានទម្លាក់កំហុសដាក់គ្នាទៅវិញទៅមក ជុំវិញការវាយប្រហារលើស្ថានីយវាស់ស្ទង់ឧស្ម័នរុស្ស៊ី នៅតំបន់ Kursk ភាគខាងលិចរបស់រុស្ស៊ី ជាទីកន្លែងដ៏សំខាន់មួយ ដែលទីក្រុងម៉ូស្គូបានប្រើប្រាស់បញ្ជូនឧស្ម័នទៅកាន់អឺរ៉ុបតាមបំពង់បង្ហូរ រហូតដល់ចុងឆ្នាំមុន។

អ្នកនាំពាក្យវិមានក្រឹមឡាំង លោក Dmitry Peskov បាននិយាយថា គំនិតដែលថារុស្ស៊ី នឹងវាយប្រហារលើហេដ្ឋារចនាសម្ព័ន្ធថាមពលខ្លួនឯងនោះ គឺមិនសមហេតុសមផលឡើយ ហើយលោកបានលើកឡើងថា ទីក្រុងមូស្គូជិតអស់ការអត់ធ្មត់ជាមួយនឹងការព្រមព្រៀងផ្អាកនេះហើយ។

លោក Peskov បានប្រាប់អ្នកសារព័ត៌មានថា៖ «ជាការពិតណាស់ ក្នុងករណីដែលរបបទីក្រុងគីវ ខកខានមិនអនុវត្តតាមការផ្អាកនេះ ភាគីរុស្ស៊ីរក្សាសិទ្ធិមិនគោរពតាមដូចគ្នាដែរ។ វាជារឿងមិនសមហេតុផលនោះឡើយដែលយើងអនុវត្តតាម តែរាល់យប់បែរជាប្រឈមនឹងការប៉ុនប៉ងវាយប្រហារលើកន្លែងហេដ្ឋារចនាសម្ព័ន្ធថាមពលរបស់យើង»។

ប៉ុន្តែសម្រាប់ពេលនេះ លោក Peskov បាននិយាយថា រុស្ស៊ីនឹងបន្តគោរពដល់ការផ្អាកនេះ ជាកិច្ចព្រមព្រៀងដែលអ៊ុយក្រែនបានចោទប្រកាន់ទីក្រុងមូស្គូថា បានរំលោភ៕