ក្រោយសង្រ្គាមស៊ីវិលរយៈពេល ៤ឆ្នាំ វិបត្តិទឹកជំនន់ធ្ងន់ធ្ងរ និងសេដ្ឋកិច្ចធ្លាក់ចុះ ឥឡូវសហភាពមីយ៉ាន់ម៉ា បានរងគ្រោះបន្ថែមទៀត ដោយសារការរញ្ជួយដីដ៏ខ្លាំងក្លា ។ មនុស្សរាប់រយនាក់ ត្រូវបានគេព្រួយបារម្ភថាស្លាប់នៅក្នុងគ្រោះរញ្ជួយដីកម្រិត ៧,៧រ៉ិចទ័រនេះ ។

ការរញ្ជួយដីនៅថ្ងៃសុក្រនេះ បានវាយប្រហារទីក្រុង Sagaing ស្ថិតនៅភាគកណ្តាលមីយ៉ាន់ម៉ា ហើយការខូចខាតទ្រង់ទ្រាយធំត្រូវបានគេរាយការណ៍ផងដែរនៅក្នុងទីក្រុងភូមិផងរបងម៉ាន់ដាឡេ ដែលជារដ្ឋធានីធំបំផុតទី ២របស់មីយ៉ាន់ម៉ា ក៏ដូចជាទីក្រុងណៃពិដោ ដែលមានចម្ងាយពីគ្នា ២៤១គ.ម ។

មន្ទីរស្ទង់ភូគព្ភសាស្រ្តសហរដ្ឋអាមេរិក(USGS) បាននិយាយថា មាននូវការរញ្ជួយដីកម្រិត ៧,៧រ៉ិចទ័រ ហើយនិងក្នុងជម្រៅដី ១០គ.ម ហើយចំណុចកណ្តាលរបស់វា ស្ថិតនៅចម្ងាយប្រហែល ១៧គ.មពីរដ្ឋធានីម៉ាន់ដាឡេ របស់មីយ៉ាន់ម៉ា ដែលមានពលរដ្ឋរស់នៅប្រហែល ១,២លាននាក់ ។

ការទទួលបានព័ត៌មាននៅមីយ៉ាន់ម៉ា ពិបាកខ្លាំងណាស់ ខ្សែទំនាក់ទំនងចល័តនៅតំបន់រងផលប៉ះពាល់ ត្រូវបានបំផ្លាញ ពេលដែលការរញ្ជួយដីកើតឡើង ប៉ុន្តែមនុស្សរាប់ម៉ឺននាក់ រស់នៅដោយគ្មានអគ្គិសនីផងដែរ ហើយការចូលដល់អ៊ីនធឺណិតមានដែនកំណត់ទៀតផង ។

ដោយឡែក ក្រុមអ្នកសារព័ត៌មានបរទេស កម្រត្រូវបានគេអនុញ្ញាតឲ្យចូលទៅក្នុងប្រទេសមួយនេះផងដែរ ដោយសាកង្វះខាតសេរីភាពសារព័ត៌មាន ។

សហភាពមីយ៉ាន់ម៉ា ត្រូវបានគេមើលឃើញភាពរំជើបរំជួល និងការគ្រប់គ្រងយោធារយៈពេលរាប់ទសវត្សរ៍ ចាប់តាំងពីការទទួលបានឯករាជ្យរបស់ពួកគេពីអង់គ្លេស កាលពីឆ្នាំ ១៩៤៨ ៕