មនុស្សរាប់ពាន់នាក់ នៅទូទាំងពិភពលោក កាលពីថ្ងៃសៅរ៍ (ទី២៩ ខែមីនា) បាននាំគ្នាតវ៉ាលោក Elon Musk និងកិច្ចប្រឹងប្រែងរបស់លោកជាមួយលោកប្រធានាធិបតី Donald Trump ក្នុងការរុះរើរដ្ឋាភិបាលសហព័ន្ធអាមេរិក ដោយអ្នកទាំងនោះបានប្រមូលផ្តុំគ្នានៅពីមុខកន្លែងតាំងបង្ហាញរថយន្តរបស់ក្រុមហ៊ុន Tesla ស្ទើរតែទាំងអស់ នៅសហរដ្ឋអាមេរិក និងជាច្រើនទៀត នៅជុំវិញពិភពលោក ជាការប្រឹងប្រែងរួមគ្នា ដើម្បីដាក់គោលដៅលើលោកមហាសេដ្ឋីដែលជានាយកប្រតិបត្តិនៃក្រុមហ៊ុនផលិតរថយន្តអគ្គិសនី។

អ្នករៀបចំការតវ៉ា បានសុំឲ្យធ្វើរឿង ៣យ៉ាង ដែលនោះគឺ កុំទិញរថយន្ត Tesla លក់ភាគហ៊ុនរបស់ក្រុមហ៊ុន Tesla ហើយចូលរួមជាមួយចលនា «Tesla Takedown» (បំផ្លាញឥទ្ធិពលរបស់ Tesla)។ បដារបស់ក្រុមអ្នកតវ៉ា បានសរសេរថា៖ «ការធ្វើឲ្យក្រុមហ៊ុន Tesla ជួបបញ្ហា កំពុងជួយបញ្ឈប់សកម្មភាពរបស់លោក Musk។ ការបញ្ឈប់លោក Musk នឹងជួយសង្រ្គោះជីវិតមនុស្ស និងលទ្ធិប្រជាធិបតេយ្យរបស់យើង»។

នៅថ្ងៃសៅរ៍នោះ ដោយមានព្រឹត្តិការណ៍ជាង ២០០ គ្រោងទុកធ្វើឡើង នៅទូទាំងពិភពលោក ការតវ៉ាបានចាប់ផ្តើមនៅថ្ងៃត្រង់ នៅពីមុខកន្លែងតាំងបង្ហាញរថយន្ត Tesla ក្នុងប្រទេសអូស្ត្រាលី និងនូវែលសេឡង់ ហើយបន្ទាប់មក បានរាលដាលពាសពេញអឺរ៉ុប ក្នុងបណ្តាប្រទេសមួយចំនួន រួមមានហ្វាំងឡង់ ន័រវែស ដាណឺម៉ាក អាល្លឺម៉ង់ បារាំង ហូឡង់ និងចក្រភពអង់គ្លេស។ 

ការប្រមូលផ្តុំតវ៉ានីមួយៗត្រូវបានរៀបចំតាមមូលដ្ឋានរៀងខ្លួនៗជាមួយនឹងប្រធានបទដើម។ នៅប្រទេសអៀរឡង់ វាជាការតវ៉ា ជាមួយនឹងពាក្យស្លោក «Smash the Fash» (បំផ្លាញពួកហ្វាស៊ីសនិយម) ហើយស្វីសមានពាក្យស្លោក «Down with Doge» (ប្រឆាំងនឹងក្រសួងប្រសិទ្ធភាពរដ្ឋាភិបាល)។ រូបថតជាច្រើនដែលត្រូវបានបានបង្ហោះនៅគណនីបណ្ដាញសង្គម Bluesky ដោយក្រុមអ្នកតវ៉ា Tesla Takedown បានបង្ហាញឲ្យឃើញក្រុមបាតុករ នៅទីក្រុង San Jose រដ្ឋ California នៅជិតកន្លែងដែលជាទីស្នាក់ការពីមុនរបស់ក្រុមហ៊ុន Tesla និងទីក្រុង Austin រដ្ឋ Texas ដែលជាទីស្នាក់ការកណ្តាលរបស់ក្រុមហ៊ុន នាពេលនេះ។

គួរបញ្ជាក់ថា លោក Musk ដែលជាមហាសេដ្ឋីលំដាប់ពិភពលោក កំពុងដឹកនាំអ្វីដែលគេហៅថា «ក្រសួងប្រសិទ្ធភាពរដ្ឋាភិបាល» (DOGE) ដែលរូបលោកមានភារកិច្ចកាត់បន្ថយថវិកាសហព័ន្ធ នៅសហរដ្ឋអាមេរិក ក្នុងនោះរួមទាំងការបញ្ឈប់បុគ្គលិករាប់ពាន់នាក់ ទោះបីជាលោកបានប្រាប់នៅក្នុងបទសម្ភាសន៍មួយកាលពីថ្ងៃព្រហស្បតិ៍ថា «ស្ទើរតែគ្មាននរណាម្នាក់ត្រូវបានបណ្តេញចេញក៏ដោយ»៕