នៅក្នុងសុន្ទរកថាដែលត្រូវបានចាក់ផ្សាយតាមទូរទស្សន៍ កាលពីថ្ងៃសៅរ៍ (ទី២៩ ខែមីនា) ប្រមុខក្រុមហាម៉ាស លោក Khalil al-Hayya (ខាលី អាល់ហេយ៉ា) បាននិយាយថា ក្រុមសកម្មប្រយុទ្ធមួយនេះ បានយល់ព្រម ចំពោះសំណើបទឈប់បាញ់ នៅតំបន់ហ្កាហ្សា ដែលខ្លួនបានទទួលក្នុងសប្តាហ៍នេះ ពីអ្នកសម្របសម្រួល នៅក្នុងប្រទេសអេហ្ស៊ីប និងកាតា។

ក្នុងសុន្ទរកថានោះ លោក អាល់ហេយ៉ា បានបន្ថែមថា លោកសង្ឃឹមថា ការកាន់កាប់របស់អ៊ីស្រាអែល នឹងមិនធ្វើឲ្យខូចដល់ផែនការ ដែលមានបំណងធានាឲ្យមានការផ្អាកសង្គ្រាម រវាងក្រុមហាម៉ាស និងអ៊ីស្រាអែល នៅតំបន់ហ្កាហ្សា ពោលគឺជាជម្លោះដែលបានផ្ទុះឡើង កាលពីខែតុលា ឆ្នាំ២០២៣។

ប្រភពសន្តិសុខ បានប្រាប់សារព័ត៌មាន Reuters (រ៉យទ័រ) កាលពីថ្ងៃព្រហស្បតិ៍កណ្ដាលសប្ដាហ៍នេះថា អេហ្ស៊ីបបានទទួលសញ្ញាវិជ្ជមានពីអ៊ីស្រាអែល ជុំវិញសំណើបទឈប់បាញ់ថ្មី ដែលនឹងរួមបញ្ចូលដំណាក់កាលអន្តរកាល។ ប្រភពបាននិយាយថា សំណើនេះស្នើឲ្យក្រុមហាម៉ាស់ជារៀងរាល់សប្តាហ៍ដោះលែងចំណាប់ថ្នូរអ៊ីស្រាអែលចំនួន ៥នាក់ដែលក្រុមនេះកំពុងឃុំខ្លួន។

ការិយាល័យនាយករដ្ឋមន្ត្រីអ៊ីស្រាអែល បានឲ្យដឹងថា ខ្លួនបានពិភាក្សាលើសំណើនេះ ហើយបានបញ្ជូនសំណើតបតទៅកាន់អ្នកសម្របសម្រួល។ សារព័ត៌មានរ៉យទ័រ បានទាក់ទងសួរទៅការិយាល័យនាយករដ្ឋមន្ត្រីថា តើខ្លួនបានយល់ព្រមលើសំណើបទឈប់បាញ់នេះដែរ ឬយ៉ាងណា ប៉ុន្តែមិនមានការឆ្លើយតបភ្លាមៗនោះឡើយ៕