នាយករដ្ឋមន្រ្តីអ៊ីស្រាអែល លោក Benjamin Netanyahu បានទាមទារម្តងទៀតកាលពីថ្ងៃអាទិត្យ ៣០ មីនា ឱ្យក្រុមហាម៉ាស ដកអាវុធ និងឱ្យមេដឹកនាំរបស់ខ្លួនចាកចេញពីតំបន់ហ្កាហ្សា ខណៈលោកបានសន្យាថានឹងបង្កើនសម្ពាធលើក្រុមនេះ ទន្ទឹមនឹងបន្តកិច្ចខិតខំប្រឹងប្រែងដើម្បីបញ្ជូនចំណាប់ខ្មាំងត្រឡប់មកវិញ។

លោកបាននិយាយថា អ៊ីស្រាអែល នឹងធ្វើការដើម្បីអនុវត្តផែនការអន្តោប្រវេសន៍ដោយស្ម័គ្រចិត្តរបស់ប្រធានាធិបតីអាមេរិក Donald Trump សម្រាប់តំបន់ហ្កាហ្សា ហើយបាននិយាយថា គណៈរដ្ឋមន្ត្រីរបស់លោកបានយល់ព្រមបន្តដាក់សម្ពាធលើក្រុមហាម៉ាស ដែលនិយាយថា ខ្លួនបានយល់ព្រមចំពោះសំណើបទឈប់បាញ់ពីក្រុមអ្នកសម្របសម្រួលអេហ្ស៊ីប និងកាតា។

មន្ត្រីជាន់ខ្ពស់ក្រុមហាម៉ាស លោក Sami Abu Zuhri បាននិយាយថា ការអត្ថាធិប្បាយរបស់លោក Netanyahu គឺជារូបមន្តសម្រាប់ការកើនឡើងគ្មានទីបញ្ចប់ នៅក្នុងតំបន់នេះ។

លោក Netanyahu បានច្រានចោលការអះអាងដែលថា អ៊ីស្រាអែល ដែលបានបន្តការទម្លាក់គ្រាប់បែកលើតំបន់ហ្កាហ្សា បន្ទាប់ពីមានបទឈប់បាញ់រយៈពេលពីរខែ ហើយបានបញ្ជូនកងទ័ពត្រឡប់ទៅក្នុងដែនដីរងការឡោមព័ទ្ធនោះ គឺមិនមានការចរចា ។

កាលពីថ្ងៃសៅរ៍ លោក Khalil al-Hayya មេដឹកនាំក្រុមហាម៉ាសនៅហ្កាហ្សា បាននិយាយថា ក្រុមនេះបានយល់ព្រមចំពោះសំណើដែលប្រភពសន្តិសុខបាននិយាយថា រួមមានការដោះលែងចំណាប់ខ្មាំងអ៊ីស្រាអែល៥នាក់ក្នុងមួយសប្តាហ៍ ប៉ុន្តែលោកបាននិយាយថា ការទម្លាក់អាវុធរបស់ខ្លួនដូចដែលអ៊ីស្រាអែលបានទាមទារគឺជា «បន្ទាត់ក្រហម» ដែលក្រុមនេះនឹងមិនឆ្លងកាត់ឡើយ៕