ក្រុមមន្ត្រីកាកបាទក្រហមអន្តរជាតិ បានព្រមានកាលពីថ្ងៃអាទិត្យ (៣០ មីនា) ថា សហភាពមីយ៉ាន់ម៉ា ប្រឈមនឹងវិបត្តិមនុស្សធម៌ធ្ងន់ធ្ងរ បន្ទាប់ពីគ្រោះរញ្ជួយដីកម្រិត ៧,៧រិចទ័រ ដែលបានសម្លាប់មនុស្សជាង ១.៧០០នាក់ និងបង្ករបួសរាប់ពាន់នាក់ ហើយតម្រូវការជំនួយរបស់ប្រជាជនក្នុងប្រទេសនេះកំពុងកើនឡើងខ្លាំង។

រញ្ជួយដីកាលពីថ្ងៃសុក្រសប្ដាហ៍មុន ជាគ្រោះធម្មជាតិដ៏ខ្លាំងបំផុតមួយដែលបានវាយប្រហារមីយ៉ាន់ម៉ាក្នុងពេលមួយសតវត្សរ៍ ហើយបានធ្វើឱ្យខូចខាតហេដ្ឋារចនាសម្ព័ន្ធ រួមទាំងស្ពាន ផ្លូវហាយវេ អាកាសយានដ្ឋាន និងផ្លូវរថភ្លើង ដែលរារាំងដល់កិច្ចខិតខំប្រឹងប្រែងជួយសង្គ្រោះ ខណៈសង្រ្គាមស៊ីវិលកំពុងកើតមាននៅក្នុងប្រទេសអាស៊ីអាគ្នេយ៍មួយនេះ។

លោក Alexander Matheou នាយកក្នុងតំបន់សម្រាប់អាស៊ីប៉ាស៊ីហ្វិក នៃសហព័ន្ធអន្តរជាតិកាកបាទក្រហម និងអឌ្ឍចន្ទក្រហម IFRC បាននិយាយនៅក្នុងសេចក្តីថ្លែងការណ៍មួយថា "នេះមិនមែនគ្រាន់តែជាគ្រោះមហន្តរាយទេ តែគឺជាវិបត្តិមនុស្សធម៌ដ៏ស្មុគស្មាញមួយ ដែលគ្របដណ្តប់លើភាពងាយរងគ្រោះដែលមានស្រាប់"។

ក្រុមជួយសង្គ្រោះបរទេសបានទៅដល់មីយ៉ាន់ម៉ា កាលពីថ្ងៃអាទិត្យ ដើម្បីជួយប្រទេសក្រីក្រមួយនេះទប់ទល់នឹងគ្រោះមហន្តរាយ រួមទាំងមានជំនួយោ្គត់ផ្គង់ជាច្រើន ហើយកាកបាទក្រហមមីយ៉ាន់ម៉ាបាននិយាយថា អ្នកស្ម័គ្រចិត្តកំពុងគ្រប់គ្រងជំនួយដំបូង និងចែកចាយរបស់របរដូចជា ភួយ ក្រណាត់ទេសឯក និងសម្ភារៈអនាម័យដល់ប្រជាជនរងគ្រោះ៕