សហព័ន្ធអន្តរជាតិនៃសមាគមកាកបាទក្រហម និងអឌ្ឍចន្ទក្រហម (IFRC) បាននិយាយថា ខ្លួន "ខឹងសម្បារយ៉ាងខ្លាំង" ចំពោះការស្លាប់របស់គ្រូពេទ្យបឋមសង្រ្គោះចំនួន ៨នាក់ ដែលត្រូវបានសម្លាប់ក្នុងអំឡុងពេលបំពេញការងារនៅទីក្រុង Rafah ភាគខាងត្បូងដែនដីហ្កាហ្សា។

IFRC បាននិយាយថា ក្រុមរថយន្តគិលានសង្គ្រោះដឹកមនុស្ស ៩នាក់ បានរងការបាញ់ប្រហារយ៉ាងខ្លាំងនៅតំបន់ al-Hashashin កាលពីថ្ងៃទី២៣ ខែមីនា ហើយសាកសពរបស់ពួកគេត្រូវបានយកមកវិញនៅថ្ងៃអាទិត្យ (៣០ មីនា) បន្ទាប់ពីសំណើចូលទៅទីនោះ ត្រូវបដិសេធអស់មួយសប្តាហ៍ ដោយគ្រូពេទ្យម្នាក់នៅតែបាត់ខ្លួន។

សង្គមអឌ្ឍចន្ទក្រហមប៉ាឡេស្ទីន (PRCS) និយាយថា សាកសពបុគ្គលិករបស់ពួកគេត្រូវបានរកឃើញ រួមជាមួយនឹងសមាជិក ៦នាក់នៃទីភ្នាក់ងារការពារជនស៊ីវិល គ្រប់គ្រងដោយក្រុមហាម៉ាស របស់តំបន់ហ្កាហ្សា និងបុគ្គលិកអង្គការសហប្រជាជាតិម្នាក់។

ពួកគេមិនបាននិយាយថាអ្នកណាជាអ្នកបើកការបាញ់ប្រហារលើក្បួនរថយន្តនោះទេ ប៉ុន្តែក្រុមហាម៉ាស បានស្តីបន្ទោសលើកងកម្លាំងការពារអ៊ីស្រាអែល ចំពោះការវាយប្រហារនេះ។

យោធាអ៊ីស្រាអែលមិនបានធ្វើអត្ថាធិប្បាយជាសាធារណៈលើសេចក្តីថ្លែងការណ៍របស់កាកបាទក្រហម និងអឌ្ឍចន្ទក្រហមទេ។

យ៉ាងណាមិញ សារព័ត៌មាន AFP បានរាយការណ៍នៅថ្ងៃសៅរ៍ថា យោធាអ៊ីស្រាអែលសារភាពថា ខ្លួនបាញ់ទៅលើរថយន្តសង្គ្រោះបន្ទាន់នៅតំបន់ហ្គាហ្សាភាគខាងត្បូង បន្ទាប់ពីកំណត់អត្តសញ្ញាណថាជា "រថយន្តគួរឱ្យសង្ស័យ" ដោយហៅថាជារថយន្តរបស់ក្រុមហាម៉ាស និងបាន "កម្ចាត់ភេរវករហាម៉ាសជាច្រើននាក់"៕