ប្រធានាធិបតីសហរដ្ឋអាមេរិក លោក Donald Trump កាលពីថ្ងៃអាទិត្យ ទី៣០ ខែមីនា បាននិយាយថា កិច្ចព្រមព្រៀងជាមួយក្រុមហ៊ុនមេរបស់ក្រុមហ៊ុន TikTok ចិន គឺក្រុមហ៊ុន ByteDance ដើម្បីលក់កម្មវិធីវីដេអូខ្លី ដែលត្រូវបានប្រើប្រាស់ដោយពលរដ្ឋអាមេរិកចំនួន១៧០លាននាក់ នឹងត្រូវធ្វើឡើងនៅមុនថ្ងៃផុតកំណត់ថ្ងៃទី៥ ខែមេសា។

លោក Trump បានដាក់ថ្ងៃផុតកំណត់នៅថ្ងៃទី៥ ខែមេសា កាលពីខែមករាសម្រាប់ក្រុមហ៊ុន TikTok ដើម្បីស្វែងរកអ្នកទិញដែលពុំមែនជាជនជាតិចិន បើមិនដូច្នេះទេនឹងត្រូវប្រឈមនឹងបម្រាមរបស់សហរដ្ឋអាមេរិកលើមូលដ្ឋានសន្តិសុខជាតិ។

លោក Trump បានប្រាប់អ្នកសារព័ត៌មាននៅលើយន្តហោះ Air Force One កាលពីល្ងាចថ្ងៃអាទិត្យថា «យើងមានអ្នកទិញជាច្រើន»។ «មានការចាប់អារម្មណ៍ខ្លាំងលើក្រុមហ៊ុន Tiktok ហើយ«ខ្ញុំចង់ឃើញ ក្រុមហ៊ុនTiktok នៅដំណើរការ»។ សារព័ត៌មានរ៉យទ័រ បានរាយការណ៍កាលពីថ្ងៃសុក្រសប្តាហ៍មុននេះថា ក្រុមហ៊ុនឯកជន Blackstone កំពុងវាយតម្លៃលើការវិនិយោគនៅក្នុងប្រតិបត្តិការរបស់ក្រុមហ៊ុន TikTok នៅសហរដ្ឋអាមេរិក។

ក្រុមហ៊ុន Blackstone កំពុងពិភាក្សាអំពីការចូលរួមជាមួយម្ចាស់ភាគហ៊ុនពុំមែនជាជនជាតិចិនដែលមានស្រាប់របស់ក្រុមហ៊ុនមេ ByteDance ដឹកនាំដោយក្រុមហ៊ុន Susquehanna International Group និង ក្រុមហ៊ុន General Atlantic ក្នុងការរួមចំណែកដើមទុនថ្មីដើម្បីដេញថ្លៃសម្រាប់អាជីវកម្មក្រុមហ៊ុន TikTok នៅសហរដ្ឋអាមេរិក។

ទីក្រុងវ៉ាស៊ីនតោននិយាយថា កម្មសិទ្ធិក្រុមហ៊ុន TikTok របស់ក្រុមហ៊ុនមេ ByteDance មានជាប់ពាក់ព័ន្ធជាមួយរដ្ឋាភិបាលចិន ហើយទីក្រុងប៉េកាំងអាចប្រើកម្មវិធីនេះដើម្បីធ្វើប្រតិបត្តិការប្រឆាំងសហរដ្ឋអាមេរិក និងប្រមូលទិន្នន័យលើជនជាតិអាមេរិក។