​បាល់ទាត់៖ ​ក្រុម​សេះបង្កង់ Juventus បន្ទាប់ពី​រង​បរាជ័យ ២​ប្រកួត​ផ្ទួនៗ​បាន​ត្រលប់​រក​បាន​ជ័យជំនះ​មកវិញ​ នៅ​ទឹកដី​ក្រុម​បាត​តារាង Salernitana ២-០ នៃ​ក្របខណ្ឌ​អ៊ីតាលី Serie A សប្តាហ៍ទី ១៥​។​

​​បន្ទាប់ពី​ចាញ់ Chelsea ៤-០ នៅ UEFA Champions League និង​ចាញ់ Atalanta ២-០ ក្នុង​ដី​ខ្លួនឯង Juventus បាន​បើក​ការនាំ​មុខមុន​នៅ​នាទី​ទី២១ ដោយ Paulo Dybala ខណៈ​គ្រាប់​ទី​ពីរ​សំរេចបាន​ដោយ​ខ្សែប្រយុទ្ធ​អេ​ស្ប៉ា​ញ Alvaro Morata នៅ​នាទី​ទី៧០​។ ​ជ័យជំនះ​នេះ​ធ្វើឱ្យ​ក្រុម​របស់លោក Massimiliano Allegri បន្ថែម​បី​ពិន្ទុ​មាន ២៤ពិន្ទុ​ឈរ​លេខ ៧ ក្នុង​តារាង​ខណៈ Salernitana ដែល​បង្ហាញខ្លួន​នៅ​ក្របខណ្ឌ​កំពូល​អ៊ីតាលី​ជា​លើកដំបូង​តាំងពី​ឆ្នាំ១៩៩៩ នោះ​បន្ត​ឈរ​បាត​តារាង​មាន​ត្រឹម ៨ពិន្ទុ​ប៉ុណ្ណោះ​ក្រោយ​លេង​បាន ១៥ប្រកួត​។

​​ងាក​មក​ប្រកួត​ផ្សេងទៀត​យប់មិញ​ដែរ Fiorentina យកឈ្នះ Sampdoria ៣-១ ដើម្បី​បន្ត​ឈរ​ពីលើ Juventus មាន ២៤ពិន្ទុ​ស្មើគ្នា​។ ​​ខ្សែប្រយុទ្ធ​ស៊ែ​ប Dusan Vlahovic នៅតែ​បន្ត​រក​គ្រាប់​បាល់​បាន​ក្នុង​ការប្រកួត​នេះ​ដែលជា​គ្រាប់​បាល់​សរុប​ទី៣៩ ហើយ​របស់គេ​នៅ Serie A​។ ​ចំណែក Atalanta បាន​យកឈ្នះ Venezia ៤-០ ធ្វើបាន​ដោយ Mario Pasalic បី​គ្រាប់​ម្នាក់ឯង​៕

​អត្ថបទ​៖​នាង សុភា​វុ​ធ