ប្រធានាធិបតីអាមេរិក លោក ដូណាល់ ត្រាំ បាននិយាយកាលពីសុក្រថា លោកមិនបានពិភាក្សាអំពីការទិញអាវុធរបស់ទីក្រុងមូស្គូពីប្រទេសកូរ៉េខាងជើង ក្នុងអំឡុងពេលកិច្ចពិភាក្សាតាមទូរស័ព្ទនាពេលថ្មីៗនេះ ជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន ចំពេលមានការព្រួយបារម្ភជាបន្តអំពីទំនាក់ទំនងយោធាកាន់តែស៊ីជម្រៅ រវាងទីក្រុងព្យុងយ៉ាង និងទីក្រុងមូស្គូ។

លោក ត្រាំ បាននិយាយអំឡុងពេលសន្និសីទសារព័ត៌មានមួយ នៅសេតវិមានថា៖«ពុំបាននិយយអំពីរឿងដែលរុស្ស៊ីទិញអាវុធពីកូរ៉េខាងជើងនោះទេ»។

នៅចំពេលសង្រ្គាមអូសបន្លាយក្នុងប្រទេសអ៊ុយក្រែន កូរ៉េខាងជើង បានគាំទ្ររុស្ស៊ី តាមរយៈការដាក់ពង្រាយទ័ព និងការផ្គត់ផ្គង់អាវុធយុទ្ធភណ្ឌ និងមីស៊ីលបាលីស្ទីក ដែលបង្កើនការព្រួយបារម្ភថា ជំនួយយោធាបែបនេះ អាចអូសបន្លាយសង្គ្រាមកាន់តែយូរ ជាមួយនឹងផលប៉ះពាល់សន្តិសុខសម្រាប់ទាំងអឺរ៉ុប និងឥណ្ឌូ-ប៉ាស៊ីហ្វិក។

នៅពេលសួរអំពីអ្វីដែលជាបញ្ហាសំខាន់ទាក់ទងនឹងសង្រ្គាមនៅអ៊ុយក្រែន លោក ត្រាំ បាននិយាយថា លោកកំពុងធ្វើឲ្យ «បញ្ហាទាំងអស់» កាន់តែសំខាន់ថែមទៀត ដោយចង្អុលទៅបញ្ហាមួយចំនួន រួមទាំងកុមារអ៊ុយ ក្រែនដែលត្រូវបានឃុំខ្លួននៅក្នុងប្រទេសរុស្ស៊ី និងការខាតបង់របស់មនុស្ស នៅលើសមរភូមិ។