របាយការណ៍ប៉ាន់ប្រមាណមួយសម្រួលដោយក្រុមការងាររញ្ជួយដីរបស់រដ្ឋាភិបាល បានបង្ហាញនៅថ្ងៃចន្ទ (៣១ មីនា) នេះថា មនុស្សរហូតដល់ ២៩៨.០០០នាក់ នៅជប៉ុន អាចស្លាប់ក្នុងការរញ្ជួយដីទ្រង់ទ្រាយធំមួយ ប្រសិនបើគ្រោះធម្មជាតិនេះកើតឡើងនៅតំបន់ ណានកៃ តូរ៉ាហ្វុ (Nankai Trough) ហើយអាចបង្កការខូចខាត ១,៨សែនកោដិ៍ដុល្លារ និងមនុស្សជម្លៀសរាប់លាននាក់ ខណៈកិច្ចប្រឹងប្រែងបន្ថយការខូចខាត បានថយចុះប្រហែល ១០% ពីការប៉ាន់ប្រមាណពីមុនក្នុងឆ្នាំ២០១២។

ការថយចុះនេះ ធ្លាក់ខ្លាំងចេញពីគោលដៅនៃការកាត់បន្ថយចំនួនអ្នកស្លាប់ប្រហែល ៨០% ក្នុងផែនការមូលដ្ឋានឆ្នាំ២០១៤ របស់រដ្ឋាភិបាល សម្រាប់ការបង្ការគ្រោះមហន្តរាយ ដែលគូសបញ្ជាក់ពីតម្រូវការសម្រាប់ការកែប្រែសំខាន់ៗនៅក្នុងយុទ្ធសាស្ត្រជម្លៀស និងការកែលម្អហេដ្ឋារចនាសម្ព័ន្ធ។ 

របាយការណ៍និយាយថា ក្រុងសរុបចំនួន៧៦៤ នៅទូទាំង ៣១ខេត្តនៃខេត្តសរុបចំនួន៤៧ របស់ជប៉ុន នឹងជួបប្រទះការរញ្ជួយយ៉ាងហោចណាស់កម្រិតទី៦ លើមាត្រដ្ឋានអាំងតង់ស៊ីតេរញ្ជួយ ៧កម្រិតរបស់ជប៉ុន ឬរលកយក្សស៊ូណាមិ ដែលមានកម្ពស់យ៉ាងហោច ៣ម៉ែត្រ។ របាយការណ៍បន្ថែមថា មនុស្ស ២១៥.០០០នាក់ក្នុងចំណោមអ្នកស្លាប់ ២៩៨.០០០នាក់ដែលបានព្យាករ នឹងបណ្តាលមកពីរលកយក្សស៊ូណាមិ ដោយផ្អែកលើការសន្មត់ថាមានតែមនុស្ស ២០% ប៉ុណ្ណោះដែលនឹងជម្លៀសចេញភ្លាមៗ។

គួរឱ្យដឹងថា ជប៉ុន ងាយរងគ្រោះខ្លាំងចំពោះរញ្ជួយដី ដោយសារប្រទេសនេះស្ថិតក្នុងតំបន់ រញ្ជួយដីសកម្ម តាមបណ្តោយកងភ្លើងប៉ាស៊ីហ្វិក ជាទីដែលបន្ទះតិចតូនិកជាច្រើនប៉ះទង្គិចគ្នា ដែលនាំឱ្យមានការរញ្ជួយដីញឹកញាប់ និងខ្លាំងក្លា។ រញ្ជួយដីកម្រិត ៩រ៉ិចទ័រ កាលឆ្នាំ២០១១ ដែលបង្កឱ្យមានរលកយក្សស៊ូណាមិនៅជប៉ុន បានសម្លាប់មនុស្សជាង ១៥.០០០នាក់៕