មេដឹកនាំកំពូលរបស់អ៊ីរ៉ង់ លោក Ali Khamenei បាននិយាយថា លោកមិនជឿថា ការវាយប្រហាររបស់សហរដ្ឋអាមេរិកលើប្រទេសនេះពីខាងក្រៅ ទំនងជាកើតឡើង ប៉ុន្តែបានព្រមានថា ប្រសិនបើទីក្រុងវ៉ា    ស៊ីនតោន ព្យាយាមញុះញង់ឲ្យមានការបះបោរ នៅក្នុងសាធារណរដ្ឋឥស្លាម ទីក្រុងនេះ នឹងទទួលបាននូវការឆ្លើយតបដ៏ខ្លាំងក្លា។

លោក Khamenei បាននិយាយក្នុងអំឡុងថ្លែងសន្ទរកថាដែលប្រារព្ធពិធីបុណ្យ Eid al-Fitr ថា៖«ពួកគេ   គម្រាមចាត់វិធានការបង្កគ្រោះថ្នាក់ ប៉ុន្តែយើងមិនជឿ ហើយវាមិនទំនងថា ពួកគេនឹងធ្វើសកម្មភាពពីខាងក្រៅនោះទេ។ ទោះយ៉ាងណាក៏ដោយ ប្រសិនបើពួកគេធ្វើបែបនេះ ការឆ្លើយតបរបស់យើង នឹងតឹងតែងបំផុត។ ប្រសិនបើពួកគេគិតពីការញុះញង់ឲ្យមានការបះបោរ នៅក្នុងប្រទេសនេះ ប្រជាជនអ៊ីរ៉ង់នឹងឆ្លើយតប»។

កាលពីថ្ងៃទី៣០ ខែមីនា ប្រធានាធិបតីអាមេរិក លោក ដូណាល់ ត្រាំ ( Donald Trump) បានប្រកាសថា ក្នុងរយៈពេលពីរសប្តាហ៍ទៀត លោកនឹងដាក់ការយកពន្ធបន្ទាប់បន្សំលើប្រទេសអ៊ីរ៉ង់ ប្រសិនបើមិនមានវឌ្ឍនភាព ក្នុងការចរចាស្តីពីកម្មវិធីនុយក្លេអ៊ែររបស់អ៊ីរ៉ង់ កើតឡើង។ លោកប្រធានាធិបតី បានគំរាមថា ក្នុងករណីមានការបដិសេធទាំងស្រុងក្នុងការបញ្ចប់កិច្ចព្រមព្រៀងមួយ សាធារណរដ្ឋឥស្លាម នឹងប្រឈមមុខនឹងការទម្លាក់គ្រាប់បែកដែលមិនធ្លាប់មានពីមុនមក 

កាលពីថ្ងៃទី ០៧ ខែមីនា លោក ត្រាំ បានសរសេរនៅលើទំព័រ Truth Social របស់លោកថា លោកបានផ្ញើសារ ទៅកាន់លោក Khamenei ដោយស្នើសុំការចរចាលើកម្មវិធីនុយក្លេអ៊ែររបស់ទីក្រុងតេអេរ៉ង់ ។ ជាការឆ្លើយតប មេដឹកនាំអ៊ីរ៉ង់រូបនេះ បានច្រានចោលសំណើនេះ ដោយបញ្ជាក់ថា អ៊ីរ៉ង់នឹងមិនចូលរួមក្នុងកិច្ចសន្ទនាជាមួយអាមេរិកឡើយ ដោយសារ ទីក្រុងវ៉ាស៊ីនតោន ត្រូវជរុញដោយផលប្រយោជន៍ផ្ទាល់ខ្លួន។

កាលពីថ្ងៃទី ២៧ ខែមីនា រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយថា ទីក្រុង តេអេរ៉ង់ បានផ្ញើតាមរយៈប្រទេសអូម៉ង់នូវការឆ្លើយតបជាផ្លូវការចំពោះលិខិតរបស់លោក ត្រំា ដែលផ្ញើទៅកាន់មេដឹកនាំសាសនាកំពូលរបស់អ៊ីរ៉ង់ លោក Ali Khamenei ។ ការឆ្លើយតបនោះ មានឯកសារពីរ។ ឯកសារទី១ បានរៀបរាប់ពីទស្សនៈរបស់ទីក្រុងតេអេរ៉ង់លើស្ថានភាពពិភពលោកបច្ចុប្បន្ន ហើយឯកសារទី ២ បានអធិប្បាយយ៉ាងពេញលេញលើសំណើដែលមាននៅក្នុងលិខិតរបស់លោក ត្រាំ ។