ធនាគារកណ្តាល នៅថ្ងៃចន្ទ (ទី៣១ ខែមីនា) នេះ បានប្រាប់ឲ្យដឹងថា ប្រព័ន្ធទូទាត់ និងសេវាកម្មផ្នែកហិរញ្ញវត្ថុរបស់ប្រទេសថៃ កំពុងដំណើរការជាធម្មតា បន្ទាប់ពីមានគ្រោះរញ្ជួយដីដ៏ខ្លាំងក្លា នៅសហភាពមីយ៉ាន់ម៉ា ជាការរញ្ជួយដែលបានប៉ះពាល់ដល់ទីក្រុងបាងកក កាលពីថ្ងៃទី២៨ ខែមីនា។

អមដោយការប្រាប់ថា ផលប៉ះពាល់ «គួរតែមានរយៈពេលខ្លី» នោះ ទេសាភិបាលរង គឺលោកស្រី Roong Mallikamas បានឲ្យដឹងនៅក្នុងសន្និសីទសារព័ត៌មានរួមមួយថា ស្ថាប័នហិរញ្ញវត្ថុ បន្តផ្ដល់សេវាកម្មធម្មតាទាំងផ្នែកអតិថិជនលក់រាយ និងសាជីវកម្ម ដោយមិនមានផលរំខានអ្វីឡើយ។ 

ចំណែកសហព័ន្ធឧស្សាហកម្មថៃ (FTI) បានប្រាប់ថា ការផលិត និងការនាំចេញ មិនរងផលប៉ះពាល់ដោយគ្រោះរញ្ជួយដីនេះទេ ហើយពាណិជ្ជកម្មតាមព្រំដែនថៃ-មីយ៉ាន់ម៉ា នៅតែដំណើរការទៅជាធម្មតា។

ប្រធាន FTI លោក Kriengkrai Thiennukul និយាយថា៖ «ប្រតិបត្តិការផលិតកម្មឧស្សាហកម្ម នៅគ្រប់វិស័យទាំងអស់ មិនរងផលប៉ះពាល់ខ្លាំងដោយហេតុការណ៍រញ្ជួយដីនេះទេ ដោយប្រព័ន្ធផលិតកម្មសំខាន់ៗរក្សាបាននូវប្រតិបត្តិការពេញលេញ»។

លោកស្រី Asadej Kongsiri អគ្គនាយកផ្សារហ៊ុនថៃ បាននិយាយថា មូលដ្ឋានគ្រឹះនៃក្រុមហ៊ុនចុះបញ្ជី នៅតែរឹងមាំ ហើយវិស័យអាជីវកម្ម អាចដោះស្រាយស្ថានការណ៍ប្រកបដោយប្រសិទ្ធភាព។

ចំណែកការិយាល័យគណៈកម្មការធានារ៉ាប់រង បានឲ្យដឹងថា ស្ថានភាពហិរញ្ញវត្ថុរបស់ក្រុមហ៊ុនធានារ៉ាប់រងនានា មានភាពរឹងមាំ និងអាចទប់ទល់នឹងផលប៉ះពាល់ផ្នែកហិរញ្ញវត្ថុពីការបាក់រលំអគារ និងគ្រោះការរញ្ជួយដីនេះ៕