ដោយដកស្រង់សម្ដីពីមន្ត្រីអាមេរិក ២រូបដែលដឹងគម្រោងធ្វើដំណើររបស់ប្រធានាធិបតី សារព័ត៌មាន Axios កាលពីថ្ងៃអាទិត្យ (ទី៣០ ខែមីនា) បានរាយការណ៍ថា មេដឹកនាំអាមេរិកលោក Donald Trump គ្រោងនឹងទៅបំពេញទស្សនកិច្ច នៅប្រទេសអារ៉ាប៊ីសាអ៊ូឌីត នាពាក់កណ្តាលខែឧសភា ដែលជាដំណើរទៅក្រៅប្រទេសលើកទី១ ក្នុងអាណត្តិទី២ របស់លោក។

គួរបញ្ជាក់ថា អារ៉ាប៊ីសាអ៊ូឌីត បាននិងកំពុងមានតួនាទីកាន់តែលេចធ្លោ ក្នុងគោលនយោបាយការបរទេសរបស់អាមេរិក ដោយប្រទេសនេះបានរៀបចំកិច្ចពិភាក្សា រវាងសហរដ្ឋអាមេរិក និងរុស្ស៊ី ក៏ដូចជារវាងសហរដ្ឋអាមេរិក និងអ៊ុយក្រែន នៅពេលដែលលោក Trump ប្រឹងប្រែងឲ្យមានបទឈប់បាញ់ ក្នុងសង្គ្រាម រវាងទីក្រុងមូស្គូ និងគីវ ហើយសេតវិមានបានជ្រើសរើសប្រទេស ដែលអាចក្លាយជាសមាជិកនៅក្នុងកិច្ចព្រមព្រៀង Abraham (Abraham Accords)។

លោក Trump បាននិយាយកាលពីដើមខែមីនាថា លោកទំនងជានឹងធ្វើដំណើរទៅក្រៅប្រទេសជាលើកដំបូងទៅកាន់ប្រទេសអារ៉ាប៊ីសាអ៊ូឌីត ដើម្បីចុះហត្ថលេខាលើកិច្ចព្រមព្រៀងមួយដែលនឹងអនុញ្ញាតឲ្យទីក្រុងរីយ៉ាដវិនិយោគលើសពី ១សែនកោដិដុល្លារ នៅក្នុងសេដ្ឋកិច្ចសហរដ្ឋអាមេរិក ដែលរួមមានទាំងការទិញគ្រឿងយុទ្ធោបករណ៍ផងដែរ។

ដោយយោងទៅប្រភពនោះ សារព័ត៌មាន Axios បានរាយការណ៍ថា លទ្ធភាពនៃការធ្វើដំណើរនេះ ត្រូវបានពិភាក្សា ក្នុងប៉ុន្មានសប្តាហ៍ថ្មីៗនេះ រវាងមន្ត្រីជាន់ខ្ពស់អាមេរិក និងសមភាគីអារ៉ាប៊ីសាអ៊ូឌីត ក្នុងនោះរួមទាំងការពិភាក្សាខាងក្រៅពីកិច្ចព្រមព្រៀងខាងលើ ពាក់ព័ន្ធនឹងសង្គ្រាមនៅអ៊ុយក្រែនផងដែរ។

បើយោងតាមសារព័ត៌មាន Axios បានឲ្យដឹងថា ប្រភពមួយបានបង្ហើបថា ថ្ងៃទី២៨ ខែមេសា ត្រូវបានពិភាក្សាថា អាចជាកាលបរិច្ឆេទ សម្រាប់ដំណើរទស្សនកិច្ចនេះ ប៉ុន្តែត្រូវបានពន្យារពេល ខណៈដែលមន្ត្រី និងប្រភពដែលស្និទ្ធនឹងកិច្ចពិភាក្សានេះ បានប្រាប់ថា ផែនការបច្ចុប្បន្ន គឺលោក Trump អាចធ្វើដំណើរទៅកាន់ប្រទេសអារ៉ាប៊ីសាអ៊ូឌីតនៅពាក់កណ្តាលខែឧសភា។ សេតវិមានមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ៕