អឌ្ឍចន្ទក្រហមប៉ាឡេស្ទីន កាលពីថ្ងៃអាទិត្យ (ទី៣០ ខែមីនា) បានប្រាប់ឲ្យដឹងថា ខ្លួនបានរកឃើញសពអ្នកជួយសង្គ្រោះចំនួន ១៥នាក់ ដែលត្រូវបានសម្លាប់ កាលពីមួយសប្តាហ៍មុន នៅពេលដែលកងកម្លាំងអ៊ីស្រាអែលបានកំណត់គោលដៅលើរថយន្តសង្គ្រោះបន្ទាន់ នៅតំបន់ហ្កាហ្សាស្ទ្រីប។

អឌ្ឍចន្ទក្រហម បានឲ្យដឹងនៅក្នុងសេចក្តីថ្លែងការណ៍មួយថា សពរបស់គ្រូពេទ្យ ៨នាក់ មកពីអឌ្ឍចន្ទក្រហម សមាជិក ៦នាក់នៃទីភ្នាក់ងារការពារជនស៊ីវិលរបស់តំបន់ហ្កាហ្សា និងបុគ្គលិកម្នាក់នៃទីភ្នាក់ងារអង្គការសហប្រជាជាតិ ត្រូវបានគេនាំមកវិញ។ ជាមួយគ្នានេះ ស្ថាប័ននេះបានបន្ថែមថា គ្រូពេទ្យសង្គ្រោះបឋមម្នាក់មកពីអឌ្ឍចន្ទក្រហមនៅតែបាត់ខ្លួន។

ស្ថាប័ននេះបានប្រាប់ថា អ្នកដែលត្រូវបានសម្លាប់ «ត្រូវបានកំណត់គោលដៅដោយកងកម្លាំងកាន់កាប់របស់អ៊ីស្រាអែល ខណៈដែលពួកគេកំពុងបំពេញបេសកកម្មមនុស្សធម៌របស់ពួកគេ ពោលគឺនៅពេលដែលពួកគេកំពុងធ្វើដំណើរឆ្ពោះទៅកាន់តំបន់ Hashashin នៃទីក្រុង Rafah ដើម្បីផ្តល់ជំនួយដំបូងដល់មនុស្សមួយចំនួនដែលរងរបួសដោយការបាញ់ផ្លោងរបស់អ៊ីស្រាអែលនៅក្នុងតំបន់»។

ហេតុការណ៍នេះ បានកើតឡើងកាលថ្ងៃទី២៣ ខែមីនា នៅក្នុងសង្កាត់ Tal al-Sultan នៃទីក្រុង Rafah ជិតព្រំដែនប្រទេសអេហ្ស៊ីប ពោលគឺត្រឹមតែប៉ុន្មានថ្ងៃបន្ទាប់ពីយោធាអីស្រាអែល បានចាប់ផ្ដើមការទម្លាក់គ្រាប់បែកឡើងវិញលើតំបន់ហ្កាហ្សា បន្ទាប់ពីមានបទឈប់បាញ់រយៈពេលជិត ២ខែ៕