កាលពីថ្ងៃអាទិត្យម្សិលមិញ ព្រះសង្ឃនៅសង្កាត់ Varanasi ទីក្រុង Sarnath ស្ថិតនៅភាគខាងជើងប្រទេសឥណ្ឌា បានរៀបចំពិធីបង្សុកូលដល់ជនរងគ្រោះដោយសារការរញ្ជួយដីនៅមីយ៉ាន់ម៉ា-ថៃ ។

ព្រះសង្ឃមកពីប្រទេសជាច្រើន រួមទាំងប្រទេសថៃ មីយ៉ាន់ម៉ា និងស្រីលង្កា បានជួបជុំគ្នានៅព្រះវិហារ Mulagandha Kuti Vihar ដើម្បីសូត្រធម៌សម្រាប់អ្នកដែលរងផលប៉ះពាល់ដោយសារគ្រោះមហន្តរាយធម្មជាតិមួយនេះ ។

ព្រះតេជគុណ Shibli បានមានសង្ឃដីកាថា ក្នុងនាមព្រះអង្គជាពុទ្ធសាសនិក និងក្នុងមានជាមនុស្សជាតិ នៅថ្ងៃនេះក្រុមអាត្មាបានជួបជុំគ្នា នៅគ្រប់វត្តអារាមទាំងអស់ ព្រះសង្ឃមមកពីវត្តអារាមផ្សេងៗជាច្រើននៅទីក្រុង Sarnath ដើម្បីបង្ហាញសាមគ្គីភាព និងសម្តែងមរណទុក្ខដល់ជនរងគ្រោះនៅប្រទេសថៃ និងជនរងគ្រោះនៅប្រទេសមីយ៉ាន់ម៉ា ។

ការរញ្ជួយដីកម្រិត ៧,៧រ៉ិចទ័រកាលពីថ្ងៃសុក្រ បានបង្កវិនាសកម្មទ្រង់ទ្រាយធំនៅមីយ៉ាន់ម៉ា និងបណ្តាលឲ្យមានការខូចខាត និងមនុស្សស្លាប់ផងដែរនៅប្រទេសជិតខាងថៃ ។

មន្ទីរស្ទង់ភូគព្ភសាស្រ្តសហរដ្ឋអាមេរិក បានប៉ាន់ស្មានថា ចំនួនមនុស្សស្លាប់សរុបនៅមីយ៉ាន់ម៉ា អាចនឹងកើនឡើងលើសពី ១ម៉ឺននាក់ ហើយការខាតបង់ អាចច្រើនជាងទិន្នផលសេដ្ឋកិច្ចប្រជុំឆ្នាំរបស់ប្រទេសមួយនេះទៅទៀត ៕