យោធាអ៊ីស្រាអែលនៅថ្ងៃចន្ទនេះ បានចេញបញ្ជាជម្លៀសចេញយ៉ាងទូលំទូលាយដែលគ្របដណ្តប់ភាគច្រើននៃទីក្រុង Rafah ដោយបង្ហាញថា យោធានេះ នឹងអាចចាប់ផ្តើមប្រតិបត្តិការជើងគោកដ៏សំខាន់មួយផ្សេងទៀត នៅក្នុងទីក្រុងចុងខាងត្បូង ក្នុងតំបន់ហ្កាហ្សាស្ទ្រីប។

អ៊ីស្រាអែលបានបញ្ចប់បទឈប់បាញ់របស់ខ្លួន ជាមួយនឹងក្រុមសកម្មប្រយុទ្ធហាម៉ាស ហើយបានបន្ត    សង្គ្រាមផ្លូវអាកាស និងថ្មើរជើង នៅដើមខែនេះ។ នៅដើមខែមីនា ប្រទេសនេះ បានកាត់ផ្តាច់ការផ្គត់ផ្គង់ស្បៀងអាហារ ប្រេងឥន្ធនៈ ថ្នាំពេទ្យ និងជំនួយមនុស្សធម៌ទាំងអស់ ពីប្រជាជនប៉ាឡេស្ទីនប្រហែល ២ លាននាក់នៃទឹកដីនេះ ដើម្បីដាក់សម្ពាធក្រុមហាម៉ាស ឲ្យទទួលយកការផ្លាស់ប្តូរកិច្ចព្រមព្រៀងបទឈប់បាញ់នេះ ។

បទបញ្ជាឲ្យជម្លៀសនេះ បានលេចឡើងគ្របដណ្តប់ស្ទើរតែទាំងអស់នៃទីក្រុង និងតំបន់ក្បែរនោះ។ យោធាបានបញ្ជាឲ្យប្រជាជនប៉ាឡេស្ទីនធ្វើដំណើរទៅកាន់ជំរំ Muwasi ដែលជាជំរំតង់ដ៏ធំទូលាយ នៅតាមឆ្នេរសមុទ្រ។ បញ្ជានេះ បានធ្វើឡើងក្នុងអំឡុងពិធីបុណ្យ Eid Al-Fitr ដែលពិធីបុណ្យមូស្លីមធម្មតា ដែលប្រារព្ធឡើងនៅថ្ងៃបញ្ចប់នៃពិធីបុណ្យរ៉ាម៉ាដាន។

អ៊ីស្រាអែលបានបើកប្រតិបត្តិការដ៏ធំមួយនៅទីក្រុង Rafah ជាប់ព្រំដែនជាមួយអេហ្ស៊ីប កាលពីខែឧសភាឆ្នាំមុន ដោយបានបណ្តាលផ្នែកជាច្រើននៃដែនដីនេះខូចខាតស្ទើរតែទាំងស្រុង។  យោធាបានរឹបអូសច្រករបៀងយុទ្ធសាស្ត្រ នៅតាមព្រំដែនក៏ដូចជាច្រកឆ្លងកាត់ Rafah ជាមួយអេហ្ស៊ីប ដែលជាច្រកតែមួយគត់របស់តំបន់ហ្កាហ្សាទៅកាន់ពិភពខាងក្រៅ ដែលមិនត្រូវបានគ្រប់គ្រងដោយអ៊ីស្រាអែល។