របាយការណ៍របស់រដ្ឋាភិបាល ដែលចេញផ្សាយនៅថ្ងៃចន្ទ (ទី៣១ ខែមីនា) នេះ បានបង្ហាញការប៉ាន់ប្រមាណថា សេដ្ឋកិច្ចរបស់ប្រទេសជប៉ុន អាចខាតបង់ដល់ទៅ ១,៨១សែនកោដិដុល្លារ នៅក្នុងករណីមានគ្រោះរញ្ជួយដីកម្រិតខ្លាំងក្លាបំផុតដែលត្រូវបានរំពឹងទុកជាយូរមកហើយថា នឹងកើតមាននៅម្ដុំឆ្នេរមហាសមុទ្រប៉ាស៊ីហ្វិក ដោយវាអាចធ្វើឲ្យមានរលកយក្សស៊ូណាមិ អគាររាប់រយបាក់រលំ និងឆក់យកមនុស្សប្រហែល ៣០០.០០០នាក់។

របាយការណ៍របស់ការិយាល័យគណៈរដ្ឋមន្ត្រី បានបង្ហាញថា ការរំពឹងទុកពីការខូចខាតផ្នែកសេដ្ឋកិច្ច ក្នុងចំនួន ២៧០,៣សែនកោដិយ៉េន ឬជិតពាក់កណ្តាលនៃផលិតផលក្នុងស្រុកសរុប (GDP) របស់ប្រទេសនេះ គឺកើនឡើងយ៉ាងខ្ពស់ពីការប៉ាន់ស្មានកាលពីមុនចំនួន ២១៤,២សែនកោដិយ៉េន ដោយការប៉ាន់ប្រមាណថ្មីនេះ បានពិចារណាទៅលើសម្ពាធអតិផរណា និងការធ្វើបច្ចុប្បន្នភាពនៃទិន្នន័យពីលក្ខណៈភូមិសាស្ត្រលើដី ដែលបានពង្រីកតំបន់ទឹកជំនន់កាន់តែធំជាងមុន។

ជប៉ុនគឺជាប្រទេសមួយក្នុងចំណោមប្រទេស នៅលើពិភពលោក ដែលងាយរងគ្រោះបំផុតដោយការរញ្ជួយដី ហើយរដ្ឋាភិបាលប៉ាន់ប្រមាណថា ឱកាសប្រហែល ៨០ភាគរយ អាចកើតមានគ្រោះរញ្ជួយដីកម្រិតពី ៨ ទៅ ៩រ៉ិចទ័រ នៅតាមបណ្ដោយតំបន់បាតសមុទ្រងាយញ័ររញ្ជួយ ដែលគេស្គាល់ថា តំបន់ Nankai Trough។

នៅក្នុងករណីដ៏អាក្រក់បំផុត ដោយផ្អែកលើលទ្ធភាពនៃការមានរញ្ជួយដីកម្រិត ៩រ៉ិចទ័រ នៅតំបន់នោះ ជប៉ុនទំនងជានឹងឃើញមានអ្នកត្រូវជម្លៀសចំនួន ១,២៣លាននាក់ ឬ ១០ភាគរយនៃចំនួនប្រជាជនសរុប។ ហើយបើយោងតាមរបាយការណ៍ខាងលើ បានបង្ហាញថា មនុស្សរហូតដល់ទៅ ២៩៨.០០០នាក់ អាចបាត់បង់ជីវិត ដោយសាររលកយក្សស៊ូណាមិ និងការដួលរលំអគារ ប្រសិនបើគ្រោះរញ្ជួយដីកើតឡើងនៅពេលយប់នារដូវរងារ៕