កាលពីខែកុម្ភៈឆ្នាំមុន មនុស្សជាង ១៣០.០០០នាក់ បានប្រឈមជាមួយការល្បាតតាមព្រំដែន ខណៈដែលពួកគេព្យាយាមឆ្លងដែនដោយខុសច្បាប់ចូលទៅសហរដ្ឋអាមេរិក ពីប្រទេសម៉ិកស៊ិក។ តែបើយោងតាមក្រសួងការពារជាតិអាមេរិក បានឲ្យដឹងថា នៅខែកុម្ភៈឆ្នាំនេះ ចំនួននោះបានធ្លាក់ចុះយ៉ាងខ្លាំងមកនៅត្រឹមប្រហែល ៨.៣០០នាក់ ពោលគឺស្ទើរតែជិត ៩៤ភាគរយ។

ប្រមុខល្បាតព្រំដែន លោក Mike Banks បានទទួលស្គាល់ថា តួលេខជិតនឹងកម្រិតទាបបំផុតនេះ កើតមានឡើងព្រោះតែសមិទ្ធផលរបស់ប្រធានាធិបតីអាមេរិក លោក Donald Trump ដែលហាក់ដូចជាកំពុងធ្វើឲ្យបានយ៉ាងល្អតាមការសន្យាមួយ ក្នុងចំណោមការសន្យានានា អំឡុងពេលធ្វើយុទ្ធនាការរបស់លោក នោះគឺការការពារព្រំដែនរបស់អាមេរិក។

ចាប់តាំងពីលោកបានវិលត្រឡប់ទៅកាន់សេតវិមានវិញ កាលពី ២ខែមុន លោកបានដាក់ចេញនូវក្រឹត្យជាបន្តបន្ទាប់ ដើម្បីទប់ស្កាត់អន្តោប្រវេសន៍ខុសច្បាប់។ ក្រឹត្យទាំងនោះរួមមានទាំងការបញ្ជាឲ្យផ្អាកប្រព័ន្ធសុំសិទ្ធិជ្រកកោនរបស់សហរដ្ឋអាមេរិក បង្កើនកិច្ចប្រឹងប្រែងនិរទេសខ្លួន និងដាក់ពង្រាយកងទ័ពបន្ថែម នៅតាមតំបន់ព្រំដែនភាគខាងត្បូង។

ជាមួយគ្នានេះ រូបលោកក៏បានឲ្យម៉ិកស៊ិកដាក់ពង្រាយទាហាន ដើម្បីការពាររបងជាប់ព្រំដែន ជាផ្នែកនៃកិច្ចព្រមព្រៀង ដែលពន្យារដល់ការដំឡើងពន្ធខ្ពស់ខ្លាំងរបស់សហរដ្ឋអាមេរិក លើទំនិញនាំចូលរបស់ម៉ិកស៊ិក។ ក្រុមអ្នកសង្កេតការណ៍បាននិយាយថា ការបង្រ្កាបយ៉ាងទូលំទូលាយដោយរដ្ឋាភិបាលរបស់រដ្ឋបាលលោក Trump បានបញ្ជូនការព្រមានយ៉ាងខ្លាំងក្លាដល់អ្នកដែលគិតចង់ឆ្លងព្រំដែនអាមេរិក ដោយគ្មានការអនុញ្ញាត ដែលថា ពួកគេអាចនឹងត្រូវបាននិរទេស។

ចាប់តាំងពីយុទ្ធនាការនិរទេសរបស់លោក Trump បានចាប់ផ្តើម វីដេអូនៃជើងហោះហើរពេញទៅដោយជនអន្តោប្រវេសន៍ ត្រូវបានផ្សព្វផ្សាយព្រោងព្រាត នៅតាមបណ្ដាញសារព័ត៌មាន។ ករណីមួយ ក្នុងចំណោមករណីដ៏ល្បីបំផុតនោះ គឺមនុស្សដែលត្រូវបានចោទប្រកាន់ថា ជាសមាជិកក្រុមអន្ធពាលវេណេហ្ស៊ុយអេឡាជាង ២៥០នាក់ ត្រូវបានបញ្ជូនទៅពន្ធនាគារ ក្នុងប្រទេសអែលសាល់វ៉ាឌ័រ បន្ទាប់ពីលោក Trump បានអំពាវនាវឲ្យមានច្បាប់ប្រឆាំងនឹងបុគ្គលដែលត្រូវបានចាត់ទុកថា បង្កការគំរាមកំហែងដល់សន្តិសុខ៕