ក្រុមមន្ត្រីអ៊ីស្រាអែល នៅថ្ងៃចន្ទ (ទី៣១ ខែមីនា) នេះ បានឲ្យដឹងថា អ៊ីស្រាអែលបានស្នើបន្លាយរយៈពេលនៃបទឈប់បាញ់ នៅតំបន់ហ្កាហ្សា ជាថ្នូរនឹងការបានវិលត្រលប់មកវិញប្រមាណជាពាក់កណ្ដាលនៃចំណាប់ថ្នូរដែលនៅសល់ ខណៈដែលយោធាបានចេញបញ្ជាជម្លៀសថ្មី ហើយបានប្រាប់ថា «ប្រតិបត្តិការដ៏ខ្លាំងក្លា» ត្រូវបានគ្រោងទុកធ្វើឡើងនៅភាគខាងត្បូងនៃដែនដីនេះ។

សំណើចុងក្រោយបំផុតនេះ នឹងបើកផ្លូវឲ្យមានកិច្ចព្រមព្រៀងចុងក្រោយ ស្តីពីការបញ្ចប់សង្គ្រាមអ៊ីស្រាអែល-ហាម៉ាស ដែលបានបំផ្លាញតំបន់ហ្កាហ្សាគ្រប់ទីកន្លែង សម្លាប់មនុស្សរាប់ម៉ឺននាក់ និងជម្លៀសប្រជាជនស្ទើរតែទាំងស្រុងចេញពីដែនដីនេះ ចាប់តាំងពីភ្លើងសង្គ្រាមបានចាប់ផ្តើមផ្ទុះឡើង នៅក្នុងខែតុលា ឆ្នាំ២០២៣។

មន្ត្រីអ៊ីស្រាអែលដែលនិយាយក្នុងលក្ខខណ្ឌមិនបញ្ចេញឈ្មោះ បានឲ្យដឹងថា ប៉ុន្តែសំណើនេះបានរំពឹងទុកពីវិលត្រលប់មកវិញនូវចំណាប់ថ្នូរពាក់កណ្ដាលនៃចំនួន ២៤នាក់ ដែលត្រូវបានគេជឿថា នៅមានជីវិត ក្នុងតំបន់ហ្កាហ្សា ពោលគឺរយៈពេលជិត ១៨ខែ បន្ទាប់ពីពួកគេត្រូវបានចាប់ខ្លួនដោយខ្មាន់កាំភ្លើងដឹកនាំដោយក្រុមហាម៉ាស ហើយប្រហែលពាក់កណ្តាលនៃចំនួន ៣៥នាក់ ត្រូវបានគេសន្មត់ថា បានស្លាប់ អំឡុងមានបទឈប់បាញ់រយៈពេលចន្លោះពី ៤០ ទៅ៥០ថ្ងៃ។

កាលពីថ្ងៃអាទិត្យ (ទី៣០ ខែមីនា) លោកនាយករដ្ឋមន្ត្រី Benjamin Netanyahu បាននិយាយថា អ៊ីស្រាអែលនឹងបង្កើនសម្ពាធលើក្រុមហាម៉ាស ប៉ុន្តែនឹងបន្តការចរចា «ក្រោមការវាយប្រហារ»។ លោកបានបន្តថា ការបន្តសម្ពាធយោធា គឺជាមធ្យោបាយដ៏ល្អបំផុតក្នុងការធានាឲ្យបាននូវការវិលត្រលប់មកវិញនៃចំណាប់ថ្នូរដែលនៅសល់៕