ជនជាប់ទោសពីបទឧក្រិដ្ឋកម្មសង្រ្គាមដែលមានមូលដ្ឋាននៅប្រទេសអ៊ូហ្គង់ដា បានប្រកាសអំពីចលនាឧទ្ទាមថ្មី ដែលត្រូវបានបង្កើតឡើង ក្នុងគោលបំណងប្រយុទ្ធជាមួយរដ្ឋាភិបាល នៅក្នុងខេត្ត Ituri ភាគខាងកើតប្រទេសកុងហ្គោ ដោយនេះបង្កជាការគំរាមកំហែងផ្នែកសន្តិសុខមួយផ្សេងទៀត នៅក្នុងតំបន់ដែលពោរពេញដោយសង្រ្គាម។

ការបង្កើតក្រុមឧទ្ទាមមួយផ្សេងទៀតរបស់លោក Thomas Lubanga ដែលមានដើមកំណើតនៅខេត្ត Ituri កើតមានឡើងនៅពេលដែលកងទ័ពរបស់កុងហ្គោ ប្រឈមនឹងការរុលទៅមុខដែលមិនធ្លាប់មានពីមុនមករបស់ក្រុមឧទ្ទាម M23 ដែលគាំទ្រដោយប្រទេសរ៉ាន់ដា នៅកន្លែងផ្សេងទៀតនៃភាគខាងកើតរបស់កុងហ្គោ។

គួររំលឹកថា តុលាការព្រហ្មទណ្ឌអន្តរជាតិ (ICC) បានចេញសាលក្រមផ្តន្ទាទោសលើកដំបូងរបស់ខ្លួន ចំពោះលោក Lubanga ក្នុងឆ្នាំ២០១២ ជុំវិញការចោទប្រកាន់ពីបទជ្រើសរើសកុមារឲ្យចូលធ្វើទាហាន ហើយបានកាត់ទោសលោកឲ្យជាប់ពន្ធនាគារ ១៤ឆ្នាំ។

រូបលោកត្រូវបានដោះលែងនៅឆ្នាំ២០២០ ហើយលោកប្រធានាធិបតី Felix Tshisekedi បានតែងតាំងលោកនៅក្នុងក្រុមការងារពិសេសទទួលបន្ទុកធ្វើយ៉ាងណានាំសន្តិភាពមកឲ្យខេត្ត Ituri។ ប៉ុន្តែនៅឆ្នាំ២០២២ លោកត្រូវបានក្រុមឧទ្ទាមចាប់ធ្វើជាចំណាប់ខ្មាំងរយៈពេល ២ខែ ជាហេតុការណ៍ដែលលោកបានស្តីបន្ទោសរដ្ឋាភិបាល ហើយឥឡូវនេះមានមូលដ្ឋាននៅប្រទេសអ៊ូហ្គង់ដា។

នៅក្នុងការឆ្លើយតបជាលាយលក្ខណ៍អក្សរ ចំពោះសំណួររបស់សារព័ត៌មាន Reuters លោក Lubanga បាននិយាយថា ក្រុមរបស់លោក មានទាំងគោលនយោបាយ និងគ្រឿងយុទ្ធោបករណ៍ ក្នុងនោះរួមមានទាំងក្រុមប្រដាប់អាវុធ នៅក្នុងតំបន់ចំនួន ៣ នៃខេត្ត Ituri ផងដែរ៕