តុលាការបារាំង កាលពីថ្ងៃចន្ទ (៣១ មីនា) បានរារាំងមេដឹកនាំស្តាំនិយមជ្រុលរបស់បារាំង លោកស្រី ម៉ារីន ឡឺប៉ែន (Marine Le Pen) មិនឱ្យឈរឈ្មោះក្នុងការបោះឆ្នោតប្រធានាធិបតីឆ្នាំ២០២៧ បន្ទាប់ពីលោកស្រីត្រូវបានកាត់ទោសពីបទកេងបន្លំ ឬពុករលួយ ក្នុងសេចក្តីសម្រេចដ៏ធំមួយដែលអាចជំរុញឱ្យមានភាពតានតឹងជាសកល ជុំវិញកិច្ចប្រឹងប្រែងរបស់តុលាការក្នុងការលូកដៃចូលរឿងនយោបាយ។

សេចក្តីសម្រេចរបស់តុលាការ គឺជាការបរាជ័យដ៏មហន្តរាយសម្រាប់លោកស្រី Le Pen វ័យ ៥៦ឆ្នាំ ដោយសារប្រធានគណបក្សរួបរួមកម្លាំងជាតិ (RN) រូបនេះ គឺជាឥស្សរជនដ៏លេចធ្លោមួយរូបនៃក្រុមស្តាំនិយមជ្រុលអឺរ៉ុប និងជាអ្នកនាំមុខក្នុងការបោះឆ្នោត សម្រាប់ការប្រកួតប្រជែងឆ្នាំ២០២៧ របស់បារាំង។

ចៅក្រមបារាំងនិយាយថា លោកស្រី Le Pen គឺ "ជាមនុស្សសំខាន់" នៃគម្រោងមួយក្នុងការកេងបន្លំមូលនិធិជាង ៤លានអឺរ៉ូ (៤,៣លានដុល្លារ) នៃសហភាពអឺរ៉ុប ហើយប្រើប្រាស់ក្នុងផ្លូវខុស ដើម្បីបង់ប្រាក់ឱ្យបុគ្គលិកបក្សស្តាំនិយមជ្រុលនៅបារាំង។ ចៅក្រមបន្ថែមថា ការមិនមានវិប្បដិសារីរបស់លោកស្រី Le Pen និងចុងចោទផ្សេងទៀត គឺជាហេតុផលដែលជំរុញឱ្យតុលាការហាមឃាត់ពួកគេមិនឱ្យឈរឈ្មោះជាមន្រ្តីរដ្ឋាភិបាល និងមានប្រសិទ្ធិភាពភ្លាមៗ។

លោកស្រី Le Pen និយាយថាខ្លួនស្អាតស្អំ ហើយនឹងប្តឹងឧទ្ធរណ៍ ប្រឆាំងនឹងអ្វីដែលលោកស្រីពណ៌នាថាជា "សេចក្តីសម្រេចនយោបាយ" ដែលមានបំណងរារាំងកិច្ចប្រឹងប្រែងប្រធានាធិបតីរបស់លោកស្រី។

បម្រាមតំណែងរដ្ឋរយៈពេល ៥ឆ្នាំរបស់លោកស្រី Le Pen មិនអាចផ្អាកដោយការប្តឹងឧទ្ធរណ៍បានទេ ប៉ុន្តែលោកស្រីនឹងអាចរក្សាអាសនៈសភា រហូតដល់អាណត្តិរបស់ខ្លួន។ លោកស្រីក៏រងការកាត់ទោសឱ្យជាប់ពន្ធនាគារ ៤ឆ្នាំផងដែរ ដោយ ២ឆ្នាំត្រូវបានផ្អាក និង ២ឆ្នាំទៀតក្រោមការឃុំខ្លួនក្នុងផ្ទះ ហើយពិន័យជាប្រាក់ ១០០.០០០អឺរ៉ូ ប៉ុន្តែទាំងនេះនឹងមិនត្រូវអនុវត្តភ្លាមទេ រហូតដល់ការប្តឹងឧទ្ធរណ៍បញ្ចប់៕