គណនីប្រព័ន្ធផ្សព្វផ្សាយសង្គម ដែលមានទំនាក់ទំនងជាមួយទូរទស្សន៍រដ្ឋចិន CCTV បាននិយាយកាលពីថ្ងៃចន្ទ (៣១ មីនា) ថា ចិន ជប៉ុន និងកូរ៉េខាងត្បូង បានយល់ព្រមឆ្លើយតបរួមគ្នា ចំពោះការដំឡើងពន្ធរបស់សហរដ្ឋអាមេរិក នៅក្នុងការអះអាងមួយដែលទីក្រុងសេអ៊ូលហៅថា "ដូចជាបំផ្លើសបន្តិច"។

ការអត្ថាធិប្បាយរបស់ប្រព័ន្ធផ្សព្វផ្សាយរដ្ឋនេះ បានកើតឡើងបន្ទាប់ពីប្រទេសទាំងបី បានបើកកិច្ចសន្ទនាសេដ្ឋកិច្ចលើកដំបូងរបស់ពួកគេក្នុងរយៈពេល ៥ឆ្នាំកាលពីថ្ងៃអាទិត្យចុងសប្ដាហ៍មុន ដោយស្វះស្វែងរកការសម្របសម្រួលពាណិជ្ជកម្មក្នុងតំបន់ ខណៈមហាអំណាចនាំចេញអាស៊ីទាំងបីនេះ រិះរកវិធីទប់ទល់នឹងពន្ធគយរបស់លោកប្រធានាធិបតីអាមេរិក Donald Trump។

គណនី Yuyuan Tantian បាននិយាយនៅក្នុងការបង្ហោះនៅលើបណ្ដាញសង្គម Weibo ថា ជប៉ុន និងកូរ៉េខាងត្បូងកំពុងស្វះស្វែងរកការនាំចូលវត្ថុធាតុដើមបន្ទះឈីបពីចិន ហើយចិន ក៏ចាប់អារម្មណ៍ក្នុងការទិញផលិតផលបន្ទះឈីបពីជប៉ុន និងកូរ៉េខាងត្បូងផងដែរ។ ការបង្ហោះនេះបន្ថែមថា ភាគីទាំងបីបានឯកភាពពង្រឹងកិច្ចសហប្រតិបត្តិការខ្សែច្រវ៉ាក់ផ្គត់ផ្គង់ និងចូលរួមកិច្ចសន្ទនាបន្ថែមទៀតលើការគ្រប់គ្រងការនាំចេញ និងទប់ទល់ពន្ធអាមេរិក។

នៅពេលត្រូវសាកសួរពីរបាយការណ៍នេះ កូរ៉េខាងត្បូងនិយាយថា "ការបង្ហើបថានឹងមានការឆ្លើយតបរួមគ្នាចំពោះពន្ធអាមេរិក ហាក់ដូចជាបំផ្លើសបន្តិចហើយ"។ សេចក្តីថ្លែងការណ៍ដែលចេញផ្សាយបន្ទាប់ពីកិច្ចប្រជុំកាលពីថ្ងៃអាទិត្យនោះបានបង្ហាញថា រដ្ឋមន្ត្រីពាណិជ្ជកម្មទាំងបី យល់ព្រមបង្កើនល្បឿនចរចាលើកិច្ចព្រមព្រៀងពាណិជ្ជកម្មសេរីកូរ៉េខាងត្បូង-ជប៉ុន-ចិន ដើម្បីលើកកម្ពស់ "ពាណិជ្ជកម្មក្នុងតំបន់ និងពិភពលោក" ដោយមិនបញ្ជាក់ពីផែនការតបតនោះទេ៕