ក្រុមហ៊ុនផលិតរថយន្ត Hyundai របស់កូរ៉េខាងត្បូង បានព្រមានអ្នកចែកចាយរថយន្តនៅសហរដ្ឋអាមេរិកថា ខ្លួនកំពុងវាយតម្លៃយុទ្ធសាស្ត្រកំណត់តម្លៃលក់ ដើម្បីទប់ទល់ការដំឡើងពន្ធ ២៥% នាពេលខាងមុខលើរថយន្ត និងគ្រឿងបន្លាស់ ដែលប្រកាសដោយលោកប្រធានាធិបតីអាមេរិក Donald Trump។

លោក Randy Parker នាយកប្រតិបត្តិ Hyundai និង Genesis Motor អាមេរិកខាងជើង បានប្រាប់អ្នកចែកចាយរថយន្តថា "តម្លៃរថយន្តបច្ចុប្បន្នមិនត្រូវបានធានាទេ ហើយអាចនឹងមានការផ្លាស់ប្តូរសម្រាប់តម្លៃលក់ដុំ បន្ទាប់ពីថ្ងៃទី០២ ខែមេសា" ស្របពេលនឹងពន្ធបដិការរបស់អាមេរិក ព្រមទាំងពន្ធថ្មីលើរថយន្តផលិតនៅបរទេស។

ក្រុមអ្នកវិភាគរំពឹងថា ក្រុមហ៊ុនផលិតរថយន្តនឹងត្រូវដំឡើងតម្លៃរថយន្តយ៉ាងច្រើន ប្រសិនបើពន្ធថ្មីនៅតែបន្តមាន ដែលធ្វើឱ្យអ្នកប្រើប្រាស់ចំណាយកាន់តែច្រើនសម្រាប់រថយន្ត ដែលមានតម្លៃជាមធ្យមជិត ៥០.០០០ដុល្លារអាមេរិករួចទៅហើយ។ ស្ថាប័ន Cox Automotive ប៉ាន់ប្រមាណថា ពន្ធ ២៥% នឹងបន្ថែម ៣.០០០ដុល្លារ ដល់តម្លៃរថយន្តដែលផលិតនៅអាមេរិក និង ៦.០០០ដុល្លារ សម្រាប់រថយន្តផលិតនៅកាណាដា ឬម៉ិកស៊ិក។

នៅក្នុងបទសម្ភាសន៍ថ្ងៃសៅរ៍ជាមួយ NBC News លោក Trump និយាយថា លោក "មិនខ្វល់បន្តិចសោះឡើយ" ប្រសិនបើក្រុមហ៊ុនផលិតរថយន្តដំឡើងថ្លៃ "ពីព្រោះប្រសិនបើតម្លៃរថយន្តបរទេសឡើង ពលរដ្ឋអាមេរិកនឹងងាកទៅទិញរថយន្តអាមេរិកវិញ" ប៉ុន្តែអ្នកជំនាញប្រកែកថា ការដំឡើងពន្ធអាចជះឥទ្ធិពលផ្ទុយពីនេះ៕