ព្យុះទឹកកកដ៏ធំមួយបានគ្របដណ្តប់លើតំបន់ Great Lakes ដ៏ធំល្វឹងល្វើយនៅភាគខាងត្បូងប្រទេសកាណាដា និងតំបន់ New England របស់សហរដ្ឋអាមេរិក ជាមួយនឹងភ្លៀងធ្លាក់ដ៏ត្រជាក់កាលពីចុងសប្តាហ៍។ វីដេអូពីប្រព័ន្ធផ្សព្វផ្សាយ បានបង្ហាញដើមឈើគ្របដណ្ដប់ដោយទឹកកកនៅតាមតំបន់ភាគខាងជើងរបស់អាមេរិក ព្រឹកថ្ងៃអាទិត្យ ៣០ មីនា។

ព្យុះទឹកកក ដែលជាព្រឹត្តិការណ៍ដ៏កម្រសម្រាប់ខែមីនា បានផ្តាច់ចរន្តអគ្គិសនីដល់អតិថិជនជិត ១លាននាក់នៅសងខាងព្រំដែនអន្តរជាតិ ហើយបានបណ្តាលឱ្យដើមឈើរាប់រយដើមដួលរលំ និងបង្កការខូចខាតទូលំទូលាយ។

នៅទីក្រុង Williamsburg រដ្ឋ Michigan របស់អាមេរិក ប៉មវិទ្យុកម្ពស់ជិត ២០០ម៉ែត្របានបាក់ធ្លាក់ចុះដោយសារតែទម្ងន់នៃទឹកកក។ ការព្រមានពីព្យុះទឹកកក ក៏ត្រូវបានដាក់ចេញសម្រាប់ផ្នែកខ្លះនៃរដ្ឋញូវយ៉ក និងរដ្ឋ Vermont ដែលការជូនដំណឹងអំពីអាកាសធាតុប្រភេទនេះមិនធ្លាប់ដាក់ចេញទេអស់ពេលជាង ៥ឆ្នាំមកនេះនៅអាមេរិក។

ស្ថានភាពអាសន្នត្រូវបានប្រកាសនៅក្នុងទីក្រុង Orillia និង Peterborough ខេត្ត Ontario របស់កាណាដា ជាទីដែលភ្លៀងធ្លាក់ដ៏ត្រជាក់បន្តរយៈពេល ៣០ម៉ោង។ យោងតាមវេបសាយតាមដានការដាច់ចរន្តអគ្គិសនី PowerOutage.com បានឱ្យដឹងថា អតិថិជន ៦២៥.០០០នាក់នៅអាមេរិក ពុំមានថាមពលច្រើនបំផុតពីព្យុះទឹកកកកាលពីថ្ងៃអាទិត្យ ខណៈអតិថិជនយ៉ាងហោចណាស់ ៣៧០.០០០នាក់នៅកាណាដា បានបាត់បង់ថាមពល ដោយសារព្យុះដ៏កម្រនេះ៕