ប្រព័ន្ធផ្សព្វផ្សាយក្នុងស្រុកបានរាយការណ៍នៅថ្ងៃអង្គារទី១ ខែមេសា នេះថា មនុស្សយ៉ាងហោចណាស់៧ នាក់ រួមមានទាំងកុមារ បានស្លាប់នៅក្នុងរដ្ឋ West Bengal ភាគខាងកើតប្រទេសឥណ្ឌា បន្ទាប់ធុងឧស្ម័នមួយ បានផ្ទុះនៅឃ្លាំងផាវមួយកន្លែង។

ឧបទ្ទវហេតុនេះ ត្រូវបានគេរាយការណ៍នៅក្នុងសង្កាត់មួយនៅភាគខាងត្បូងនៃរដ្ឋ West Bengal កាលពីយប់ថ្ងៃច័ន្ទ ទី៣១ ខែមីនា បន្ទាប់ពីអ្នកស្រុកបាននិយាយថា ពួកគេបានឮសំឡេងផ្ទុះយ៉ាងខ្លាំង ហើយបានឃើញឃ្លាំងផាវកំពុងឆេះ។ សាក្សីម្នាក់និយាយថា «ខ្ញុំបានព្យាយាមជួយ និងសង្គ្រោះជនរងគ្រោះ ប៉ុន្តែភ្លើងឆេះខ្លាំងពេក»។

យោងតាមសេចក្តីរាយការណ៍របស់ប្រព័ន្ធផ្សព្វផ្សាយក្នុងស្រុកបានឲ្យដឹងថា បុគ្គលិកនគរបាលដែលមានវត្តមាននៅកន្លែងផ្ទុះ បាននិយាយថា ជនរងគ្រោះគឺជាបុគ្គលិកនៅឃ្លាំងផាវ។

ឧបទ្ទវហេតុផ្នែកឧស្សាហកម្មបែបនេះ គឺជារឿងធម្មតានៅក្នុងប្រទេសឥណ្ឌា ហើយជារឿយៗត្រូវបានស្តីបន្ទោសលើអ្នកដែលមិនគោរពបទដ្ឋានសុវត្ថិភាព ព្រមទាំងការត្រួតពិនិត្យធូររលុងដោយមន្ត្រីរដ្ឋាភិបាល។