អង្គការ UNICEF បាននិយាយកាលពីថ្ងៃចន្ទថា ការវាយលុកជាថ្មីរបស់អ៊ីស្រាអែល នៅតំបន់ហ្កាហ្សា បានបណ្តាលឲ្យកុមារយ៉ាងហោចណាស់ ៣២២នាក់ ស្លាប់ និង ៦០៩នាក់ រងរបួស នៅក្នុងទឹកដីប៉ាឡេស្ទីន ក្នុងរយៈពេល ១០ថ្ងៃ ចុងក្រោយនេះ។

ភ្នាក់ងារកុមារអង្គការសហប្រជាជាតិ បាននិយាយនៅក្នុងសេចក្តីថ្លែងការណ៍មួយថា តួលេខទាំងនេះ រួមមានកុមារ ដែលត្រូវបានគេរាយការណ៍ថា បានសម្លាប់ ឬរងរបួស នៅពេលដែលផ្នែកវះកាត់នៃមន្ទីរពេទ្យ Al Nasser នៅភាគខាងត្បូងហ្កាហ្សា ត្រូវរងការវាយប្រហារ កាលពីថ្ងៃទី ២៣ ខែមីនា។

អង្គការ UNICEF បាននិយាយថា ភាគច្រើននៃកុមារទាំងនេះ ត្រូវបានផ្លាស់ទីលំនៅ និងស្នាក់នៅ ក្នុងតង់បណ្តោះអាសន្ន ឬផ្ទះដែលរងការខូចខាត។

ដោយបញ្ចប់បទឈប់បាញ់ជិតពីរខែ នៅក្នុងសង្គ្រាមជាមួយក្រុមហាម៉ាស អ៊ីស្រាអែលបានបន្តការទម្លាក់គ្រាប់បែកយ៉ាងខ្លាំងក្លា ទៅលើតំបន់ហ្កាហ្សា នៅថ្ងៃទី ១៨ ខែមីនា ហើយបន្ទាប់មកបានចាប់ផ្តើមការវាយលុថ្មើរជើងថ្មីមួយ។

លោកស្រី Catherine Russell នាយកប្រតិបត្តិអង្គការ UNICEF បាននិយាយថា៖«បទឈប់បាញ់នៅហ្កាហ្សា បានផ្តល់នូវខ្សែជីវិតដែលលំបាកយ៉ាងខ្លាំងសម្រាប់កុមារនៅតំបន់ហ្កាហ្សា និងក្តីសង្ឃឹមសម្រាប់ផ្លូវឆ្ពោះទៅរកការស្តារឡើងវិញ»។