ភ្នំពេញ៖ ឯកឧត្ដម វីរៈសាក់ ខូវសុរ៉ាត់សាណាវីសិត ដែលជាសមាជិកព្រឹទ្ធសភា និងជាអតីតរដ្ឋមន្ត្រីក្រសួងទេសចរណ៍ និងកីឡាថៃ ជំរុញដល់អាជ្ញាធរកម្ពុជា និងថៃ ពង្រឹងវិស័យទេសចរណ៍បែបភូមិសាស្ត្រឲ្យបានច្រើនឡើង (Region Tourism) ពិសេសក្នុងតំបន់រស់នៅរបស់ជនជាតិពីអតីតកាល ដើម្បីទាក់ទាញភ្ញៀវទេសចរណ៍។
ក្នុងជំនួយជាមួយឯកឧត្ដមបណ្ឌិត សុខ សុក្រឹត្យា ទីប្រឹក្សាសម្ដេចតេជោ ហ៊ុន សែន និងជារដ្ឋលេខាធិការក្រសួងទេសចរណ៍ ពីពេលថ្មីៗនេះ ឯកឧត្តម បានមានប្រសាសន៍ថា អាជ្ញាធរប្រទេសទាំងពីរ ត្រូវផ្តោតទៅលើរបៀបការរស់នៅ ចំណីអាហារ របៀបរបបការរស់នៅ សំលៀកបំពាក់ និងភាសា របស់ជនជាតិពីអតីតកាល ក្រៅពីនេះ ត្រូវមានការសិក្សាស្វែងយល់ ពីជនជាតិភាគតិចកម្ពុជា-ថៃ មានភាពខុសប្លែកគ្នាបែបណា ដែលចំណុចនេះសុទ្ធសឹងជួយទាក់ទាញភ្ញៀវទេសចរចូលមកកម្សាន្ត ដោយមិនចេះរីងស្ងួត។
ឯកឧត្ដមបន្តថា រាជរដ្ឋាភិបាលកម្ពុជា ត្រូវពង្រឹងលើទំនិញ ដែលជាវត្ថុអនុស្សាវរីយ៍ សម្រាប់អ្នកទេសចរ ដោយជាទូទៅអ្នកទេសចរ ត្រូវការទំនិញអនុស្សាវរីយ៍ ដែលស្រស់ស្អាត និងមានគុណភាព និងគួរយកចិត្តទុកដាក់ចាប់អារម្មណ៍ ធ្វើអាជ្ញាបណ្ណ និងកម្មសិទ្ធផ្សេងៗ របស់អ្នករស់នៅតាមសហគមន៍ ក្នុងនេះ ដូចជាជំនឿរឿងខ្មោច អារាក់អ្នកតាឬអ្វីផ្សេងៗជាដើម ហើយបើនិយាយពីព្រំដែនកម្ពុជា-ថៃ មានលក្ខណៈពិសេសខុសប្លែកពីព្រំដែនថៃ ឡាវ ភូមា និងម៉ាឡេស៊ី ហើយតំបន់ព្រំដែនរវាងប្រទេសទាំងពីរ ក៏ជាចំណុចទាក់ទាញភ្ញៀវទេសចរដែរ។
សម្រាប់ឯកឧត្ដមបណ្ឌិត សុខ សុក្រឹត្យា លើកឡើងថា កម្ពុជាបានដាក់ផែនការកែលំអហេដ្ឋារចនាសម្ព័ន្ធ គោលដៅទេសចរណ៍សំខាន់ៗជាច្រើន ដើម្បីត្រៀមទទួលភ្ញៀវទេសចរឡើងវិញ ឲ្យមានប្រសិទ្ធភាពក្រោយពីប្រកាសបើកប្រទេស កាលពីនៅថ្ងៃទី១៥ ខែវិច្ឆិកា ឆ្នាំ២០២១កន្លងមកនេះ។
ក្នុងបរិបទនេះ ឯកឧត្តមបណ្ឌិតយល់ឃើញថា កម្ពុជាគួរបង្កើតយុទ្ធសាស្ត្របែបថ្មី ដើម្បីស្តារ និងកំណែទម្រង់ស៊ីជម្រៅលើវិស័យទេសចរណ៍ ដោយក្នុងនោះមានយុទ្ធសាស្ត្រ ៧ចំណុចដូចជា ១. ផែនការអភិវឌ្ឍវិស័យទេសចរណ៍ ដែលមានរយៈពេល១២ឆ្នាំ, ២. នាំចូលផលិតផលទេសចរណ៍បរទេស ឲ្យមកវិនិយោគនៅកម្ពុជា និងជាឃ្លាំងសម្រាប់ក្រុមហ៊ុនថតកុនបរទេស, ៣. បង្កើនយុទ្ធសាស្ត្រទាក់ទាញ វិស័យទេសចរណ៍បែបវប្បធម៌ និងទេសចរណ៍លើវិស័យសាសនា (មិនចង់ឱ្យមានការចាប់អារម្មណ៍វិស័យទេសចរណ៍បែបការចូលលេងក្នុងកាស៊ីណូ), ៤. នាំយកបច្ចេកវិទ្យាយុគសម័យថ្មីប្រភេទ (Blockchain) និង (Financial Technology) មកប្រើប្រាស់ក្នុងវិស័យទេសចរណ៍, ៥. បង្កើត Mega Project ដែលមានឈ្មោះថា “តំបន់ទេសចរណ៍ពិសិដ្ឋ”, ៦. បង្កើនចំនួនតំបន់ទេសចរណ៍ នៅកម្ពុជាឱ្យបានជាច្រើនកន្លែងបន្ថែមទៀត និងកែលំអរតំបន់ទេសចរណ៍ដែលមានស្រាប់ និង៧.បង្កើតបណ្ណសមាជិកទេសចរណ៍ពិសិដ្ឋ សម្រាប់អ្នកទេសចរទូទាំងពិភពលោកឱ្យបានចំនួន ១លានសន្លឹកក្នុងមួយឆ្នាំ។
ឯកឧត្ដម បានបញ្ជាក់ថា អ្នកដែលមានសិទ្ធិទទួលបណ្ណនេះ នឹងមានសិទ្ធិពិសេសក្នុងការធ្វើដំណើរកម្សាន្តក្នុងតំបន់ទេសចរណ៍ពិសិដ្ឋ និងក្នុងប្រទេសកម្ពុជា រួមទាំងមានសិទ្ធិពិសេសក្នុងការស្នាក់នៅ វិនិយោគនៅកម្ពុជាផងដែរ៕ អត្ថបទ៖ បាន សុខរិទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
