លោកស្រី Kristalina Georgieva នាយកគ្រប់គ្រងមូលនិធិរូបិយវត្ថុអន្តរជាតិ(IMF) បាននិយាយ កាលពីថ្ងៃចន្ទថា ភាពមិនប្រាកដប្រជាជុំវិញការដំឡើងពន្ធរបស់សហរដ្ឋអាមេរិក ធ្វើឱ្យប៉ះពាល់ដល់សកម្មភាពសេដ្ឋកិច្ចសកល។

លោកស្រី Georgieva ត្រូវបានភ្នាក់ងារសារព័ត៌មាន Reuters ដកស្រង់សម្តី ដែលបាននិយាយថា កាលណាភាពមិនប្រាកដប្រជាបន្តកាន់តែយូរអំពីវិធីសាស្ត្ររបស់ប្រធានាធិបតីសហរដ្ឋអាមេរិក លោក Donald Trump ចំពោះគោលនយោបាយដំឡើងពន្ធ ហានិភ័យក៏កាន់តែខ្លាំងឡើងចំពោះទស្សនវិស័យនោះ។ លោកស្រី បាននិយាយនៅក្នុងបទសម្ភាសន៍ថា «ភាពមិនប្រាកដប្រជា តាមការស្រាវជ្រាវរបស់យើងបង្ហាញថា កាន់តែយូរ វាកាន់តែមានផលប៉ះពាល់អវិជ្ជមានដល់កំណើនសេដ្ឋកិច្ចសកល»។

លោកស្រី Georgieva និយាយថាមូលនិធិរូបិយវត្ថុអន្តរជាតិ(IMF) កំពុងមើលឃើញសញ្ញា ក្នុងទិន្នន័យថ្មីៗ ដែលទំនុកចិត្តរបស់អ្នកប្រើប្រាស់ និងវិនិយោគិន កំពុងចុះខ្សោយ ហើយក្រោយមក វាប្រែទៅជាផលប៉ះពាល់លើការទស្សនវិស័យកំណើន។

លោក Trump បានប្រកាសគំរាមដំឡើងពន្ធជាច្រើន ដោយមានមួយចំនួនបានដាក់រួចហើយ ហើយរំពឹងថានឹងប្រកាសបន្ថែមទៀតនៅថ្ងៃពុធ ។