កាលពីថ្ងៃចន្ទម្សិលមិញ ក្រុមអាជ្ញាធរកូរ៉េខាងត្បូង បានបើកការស៊ើបអង្កេតរួមគ្នាលើករណីភ្លើងឆេះព្រៃស្លាប់មនុស្សកាលពីពេលថ្មីៗនេះ ដែលបានសម្លាប់មនុស្សយ៉ាងហោច ៣០នាក់ និងឆាបឆេះអគាររាប់ពាន់ខ្នង រួមទាំងវិហារប្រវត្តិសាស្រ្តផងដែរ ។

មន្រ្តីមួយរូបមកពីនគរបាលខេត្ត Gyeongbuk និយាយថា ក្រុមអាជ្ញាធរមានជំនឿថា បុរសម្នាក់ដែលមានអាយុជាង ៥០ឆ្នាំ ចាប់ផ្តើមដុតភ្លើងនៅស្រុកភាគអាគ្នេយ៍ Uiseong ពេលដែលលោកសែនផ្នូរនៅជិតផ្នូរគ្រួសាររបស់លោកកាលពីធ្ងៃទី ២២ ខែមីនា ។

សារព័ត៌មានក្នុងស្រុក រាយការណ៍ថា នគរបាល រួមជាមួយនាយករដ្ឋពន្លត់អគ្គិភ័យ និងសេវាកម្មកោសល្យវិច្ច័យជាតិ បានប្រមូលសំណាកពីតំបន់ជុំវិញចំណុចដុតភ្លើង ហើយគ្រោងនឹងធ្វើការបញ្ជាក់ផ្ទៀងផ្ទាត់ភស្តុតាង ។

ភ្លើងឆេះព្រៃនៅស្រុក Uiseong ក៏ដូចជាភ្លើងឆេះព្រៃដាច់ដោយឡែកផ្សេងទៀតនៅទូទាំងប្រទេសកាលបីសប្តាហ៍មុន បង្កឲ្យមានការអំពាវនាវធ្វើកំណែទម្រង់ថ្នាក់ជាតិ ដើម្បីដោះស្រាយល្អប្រសើរជាងនេះលើករណីគ្រោះមហន្តរាយធម្មជាតិដូចជាភ្លើងឆេះព្រៃ ដែលក្រុមអ្នកជំនាញនិយាយថា វាមានស្ថានភាពកាន់តែធ្ងន់ធ្ងរខ្លាំង បង្កឡើងដោយសារបម្រែបម្រួលអាកាសធាតុ ៕